ཀི་ཀི་བསྭོ་བསྭོ་ལྷ་རྒྱལ་ལོ།

རྩོམ་ཡིག་འདི་ཐེངས། 773 བཀླགས་འདུག

12983325_10207945992600966_1384834020160383316_oདང་པོ་བསང་གསོལ་གྱི་བྱུང་རིམ་ནི། བདག་ཅག་གི་སྟོན་པ་ཐུགས་རྗེ་ཅན་དེ་ཉིད་ཀྱིས་ཐེག་པ་གཉིས་པ་སྣང་གཤེན་གྱི་བོན་སྒོའི་སྐབས། རྩི་ཤིང་དང༌། ཞུགས་ཤང༌། གསེར་སྐྱེམས། ནམ་རྒྱང༌། ཤིང་རིས། བལ་ཚོན་སྣ་ལྔ༌། གསེར་གཡུ། དར་ཟབ་སོགས་ཕུན་སུམ་ཚོགས་པའི་ཡོ་བྱད་བསགས་ཏེ་ལྷ་བསང་དང༌། མནོལ་གསང༌། གྲིབ་བསང༌། བཙོག་བསང་བཅས་བསང་གི་རྣམ་གྲངས་དུ་མ་ཞིག་གཏན་ལ་ཕབ་པ་ནས་བསང་གསོལ་ལྷ་མཆོད་ཀྱི་ཤེས་རིག་འདི་ཉིད་དབུ་བརྩམས་ཤིང༌། སྟོན་པའི་རྗེས་འཇུག་རྣམས་ཀྱིས་ཕྱག་ལེན་གྱི་སྲོལ་དེ་ཉིད་མ་ཉམས་པར་རྒྱུན་བསྐྱངས་གནང་བ་དང༌། ལྷག་ཏུ་སྟོན་པ་རྫོགས་པའི་སངས་རྒྱས་དེ་ཉིད་བོད་གངས་ཅན་གྱི་ཞིང་འདིར་ཕེབས་གནང་སྐབས་བོད་ཀྱི་བོན་པོ་རྣམས་ལ་ཡར་ལྷ་གསོལ་བ་དང༌། མར་གླུད་བཀར་བའི་ཐབས་རྒྱུ་བོན་ཕྲན་ཚེགས་རེ་བསྟན་པ་ནས་རིམ་བཞིན་བོད་མིའི་རྒྱུན་ལྡན་གྱི་འཚོ་བའི་ཁྲོད་མེད་དུ་མི་རུང་བའི་ཆ་རྐྱེན་ཞིག་ཏུ་གྱུར་ཏེ་བོད་རྗེ་ཐོག་མ་གཉའ་ཁྲི་བཙད་པོའི་སྐབས་གངས་ཅན་གྱི་ལྗོངས་འདིར་རྒྱུ་འབྲས་ཀྱི་བོན་ཡོངས་རྫོགས་དར་བ་དང༌། བས༵ང་མཆོད་ལྷ་གསོལ༵་གྱི་རིམ་པའང་སྔར་ལས་དར་རྒྱས་སུ་ཕྱིན་ནས་དུས་དེ་རིང་ལ་མ་ཐུག་གི་བར་དུ་བོད་ཀྱི་བླ་དཔོན་མི་དྲག་དང༌། ཆབ་འབངས་སེར་སྐྱ་སོགས་ཀྱིས་རྒྱུན་བཀོལ་གནང་བས་མ་ཚད། སྔར་དར་མ་མྱོང་བའི་ཕྱི་རྒྱལ་ཡུལ་གྲུ་གང་སར་འཕེལ་རྒྱས་འགྲོ་བཞིན་པ་ཡིན།

/

བསང་གསོལ་གྱི་ངོ་བོ་ནི། བསལ་བྱའི་རིགས་སེལ་བ་དང་དག་པར་བྱེད་པའམ། མི་གཙང་སྐྱོན་གྲིབ་ཀྱི་ཉེས་ཚོགས་དག་ཅིང་ཚངས་བར་བྱེད་པས་ན་བས༵ང་ཞེས་དང་མགྲོན་རིགས་རྣམ་པ་བཞིར་མཆོད་ཅིང་བསྟོད་ཏེ་མཉེས་སུ་གསོ༵ལ་བས་ན་དེ་སྐད་དུ་བྱེད་ལས་ཀྱི་ཆ་ནས་བརྗོད་པའོ།།

/

བསང་རྫས་ནི། དྲི་བཟང་བདུད་རྩི་ཅན་གྱི་ཤིང་སྣ་དང༌། དཀར་མངར་འབྲུ་རིགས། རིན་ཆེན་དར་ཟབ། ཕྱེ་མར་འོ་ཀོན། ཆང་ཕུད་གསེར་སྐྱེམས་སོགས་ཕུན་སུམ་ཚོགས་པའི་མཆོད་རྫས་གང་འབྱོར་རྣམས་དང༌། མནོལ་བསང་སོགས་དམིགས་བསལ་ཅན་རྣམས་ལ་བསང་རྫས་གཞན་ཡང་སྲིད་དོ།།

/

བསང་གསོལ་འབུལ་ཚུལ་ནི། ཡིན་ལུགས་བྱུང་རབས་ཀྱི་སྨྲང་བརྗོད་ཅིང༌། སྒྲ་སྙན་རོལ་དབྱངས་ཀྱིས་སྣ་དྲངས་ནས། སྲི་ཞུའི་མགྲོན་ལ་སྒྲིབ་སྦྱོང་ཚོགས་རྫོགས་ཀྱི་ཆེད་དང༌། ཡོན་ཏན་མགྲོན་ལ་བསྟན་སྲུང་གྲོགས་བཅོལ་གྱི་ཆེད། ལན་ཆགས་མགྲོན་ལ་གནོད་སེམས་གདུག་པ་ཞི་ཕྱིར་དང༌། སྙིང་རྗེའི་མགྲོན་ལ་མ་ནུས་སྦྱིན་གཏོང་གི་ཆེད་དུ་འབུལ་བའམ། ཡང་ན་ལྷ་སྲུང་ངོ་སོ་མཐོ་བ་དང༌། ནད་སེལ་བར་ཆད་ཟློག་པ༌། སྲིད་སྤེལ་སྲིའུ་གསོ་བ། ལོ་ལེགས་བཙའ་སད་སྲུང་བ། དུས་མིན་འཁྲུག་རྩོད་ཞི་བ། ཆར་ཆུ་དུས་སུ་འབབ་པ་ལ་སོགས་ཀྱི་ཆེད་དུ་འབུལ་བའོ།།

/

བསང་གསོལ་གྱི་ཕན་ཡོན་ནི། ཚེ་གཡང་ལོངས་སྤྱོད་འཕེལ་ཞིང་ཆག་ཉམས་འགལ་འཁྲུལ་སེལ་བ་དང༌། བདེ་སྐྱིད་ལེགས་པའི་དཔལ་ཡོན་ཐམས་ཅད་ཡིད་བཞིན་དུ་འགྲུབ་པ་སོགས་སོ།།

/

གཉིས་པ་རླུང་རྟའི་རིམ་པ་ལ། རླུང་རྟའི་རྒྱུ་ནི་འབྱུང་ལྔའི་ཁ་དོག་གང་རུང་གིས་མཚོན་པའི་ཤོག་བུ་དང་དར་ཚོན་ཅི་རིགས་པའི་དབུས་ཚེ་སྲོག་གི་རྒྱུན་མཚོན་བྱེད་ཅང་ཤེས་ཀྱི་རྟ་དང༌། བར་ཆོད་རྐྱེན་ཚོགས་ཀྱིས་འགོག་པ་མེད་པའི་བརྡ་རུ་སྲབ་མེད་ཁ་རྒོད་ཅན། ཕུན་ཚོགས་འདོད་དགུ་འབྱུང་བའི་བརྡར་ནོར་བུ་ཁལ་ཁུར་དང་རིན་ཆེན་རྒྱན་སྤྲས། དབང་ཐང་དགུང་དང་མཉམ་པའི་བརྡར་མགྱོགས་འགྲོ་འཕུར་སྟབས་ཀྱིས་གར་བསྒྱུར་བ། དཔལ་གྲགས་དབུ་འཕང་གྱེན་དུ་འཕྱུར་བའི་བརྡ་རུ་སྟག་སེང་ཁྱུང་འབྲུག་རིས་ཀྱིས་ཟུར་ནས་བརྒྱན་པའམ། ཡང་ན་ནམ་མཁའི་མཚོན་རྟགས་སུ་ཁྱུང༌། ས་ཡི་མཚོན་རྟགས་སུ་སེང་གེ། ཆུའི་མཚོན་རྟགས་སུ་འབྲུག མེ་ཡི་མཚོན་རྟགས་སུ་སྟག རླུང་གི་མཚོན་རྟགས་སུ་རྟ་སོགས་བཀོད་རྗེས་སྲོག་ལུས་དབང་ཐང་ཀླུང་རྟ་བླ་དཔལ་རྣམས་བསྐྱེད་པའི་གཟུངས་དང༌། ཤམ་བསྒྱུར་དུ་བདག་འཆང་པ་པོའི་ལོ་ཁམས་དང་མིང་རུས་བཅས་བྲིས་ལ་གང་མོས་འདོད་གསོལ་གྱིས་བརྒྱན་ཏེ་ཀི་བསྭོ་ལྷ་རྒྱལ་དང་བཅས་རླུང་ལ་འཕྱར་བའོ།།

/

རླུང་རྟའི་དགོས་ཕན་ནི། དེ་ལྟར་བགྱིས་པས་རླུང་ལྕམ་སྒྲོན་མ་ལ་སོགས་རླུང་གི་ལྷ་མོ་རྣམས་ཀྱི་བྱིན་རླབས་དང་ནུས་པ་ཁྱད་པར་ཅན་ཞུགས་ནས་འཆང་པ་པོའི་འབྱུང་ཁམས་བདེ་ཞིང་ཚེ་བསོད་དཔལ་གྲགས་བདེ་སྐྱིད་ལེགས་པའི་ཡོན་ཏན་ཐམས་ཅད་གོང་ནས་གོང་འཕེལ་དུ་འགྱུར་བ་ཡིན་ཏེ། ལུང་ལས། ཤིང་རྩེར་རླུང་རྟ་གཟུག་ལ་དར་ཆེན་ཕྱར།། དེ་ཡིས་ཤིང་གི་ཟིན་ཀེག་བཟློག་པར་འགྱུར།། ཞེས་དང༌། འབྱུང་བ་རླུང་གི་ལྷ་མོས་བྱིངས་བ་སེལ། ཞེས་སོགས་གསུངས་པ་ལྟར་རོ།།

གཏོ་ཡི་བཀའ་སྒྲོམ་ལས་ཟུར་འདོན་ཞུས།

/

བསམ་ཚུལ་ཕྲིས།

སྐུ་ཉིད་ཀྱི་གློག་འཕྲིན་ཁ་བྱང་གཞན་གྱིས་མཐོང་མི་ཐུབ། སྐར་རྟགས་ཅན་རྣམས་ངེས་པར་དུ་སྐོང་དགོས། *