ཕ་ཡུལ་ལུང་པ།   

རྩོམ་ཡིག་འདི་ཐེངས། 513 བཀླགས་འདུག

༠༦༢༢_1

དགའ་སྡུག་ཡིད་ཀྱི་སོར་རྩེར་ཁེན་པའི་ཕ་རོལ་འཛིན་མའི་འཕང་བ་རུ།།

ངོམས་མེད་ལྟ་བའི་སེམས་ཀྱི་རྨུ་ཐག་ལ་གཞུང་རྒྱུད་ནས་མཐེན་པ་ན།།

སྐྱེ་བ་གཅིག་གི་ལང་ཚོ་འཕོས་པའི་སྒྱུ་མའི་ཀློང་གི་ཨར་གཏད་འདིར།།

མི་ཕྱེད་རྟོག་པའི་ཞེན་པ་རབ་མེད་གཡེར་བག་དང་བཅས་བྱོ་ས་ཡིན།།

ཅུང་ཟད་གྲང་བའི་ཞོགས་ཁ་རེ་རེར་རི་ལུང་སྨུག་པའི་གོ་འཕང་བརྙེས།།

ཡང་ན་གངས་ཀྱི་འདབ་མ་ལྷུང་བས་གཉུག་ཞལ་འོད་ཀྱིས་གོང་བར་བྱེད།།

དོགས་པའི་ཉམས་དང་སྐྱེངས་བའི་སྦྱོར་བ་དེ་དག་གང་ཡང་མི་དགོས་པར།།

ཅི་དགར་རན་པའི་ག་ལ་བ་འདི་ལྷ་ཡི་གནས་དང་ཅི་སྟེ་མཚུངས།།

ལ་གཞུང་འབུམ་གྱི་སྤྱིལ་བུ་དེ་ནས་བྱིན་ཆགས་སྟོང་གི་ཆུ་བོ་གཞུར།།

མུ་མཐའ་བྲལ་བའི་ཐང་ཆེན་ཁམས་སུ་འབྱམས་སྐྱེས་སྣ་མང་མུར་གྱིས་རྡོལ།།

མཐའ་ཟད་དུལ་བའི་ནགས་ཀླུང་ཚོགས་ཀྱང་སྨིན་ལེགས་མ་ཡི་ལན་བུ་སྟེ།།

དངོས་འཛིན་ཡིད་ཀྱི་ཟོམ་དུ་བབ་ཚེ་མིག་གི་པདྨོ་གཡོ་བར་བྱེད།།

གངས་ཀྱི་སྐྱིབས་སུ་ཉི་ཟེར་འདུ་བས་མཐའ་ཀླས་ལྗོངས་ཀྱི་སྨག་མུན་སེལ།།

སྔོ་མདངས་ལུས་པའི་ལྗོན་པ་སྣ་ཚོགས་དོག་མོའི་གདན་དུ་ཕྱམ་མེར་འགྱིང་།།

དགོང་སྔོན་སྤྲིན་གྱི་ཉམས་སྒྲོབ་རྩེན་པས་ཡིད་ཀྱི་ངལ་བ་བཅོམ་མཛད་དེ།།

ཨེ་མ་བདག་གི་ཕ་ཡུལ་ལུང་པ་ཚེ་འདིར་འཕྲད་པའི་ཆུང་མ་ལགས།།

ཡངས་པའི་སྤང་ནི་འཛུམ་པའི་ཉམས་ཀྱིས་དྲི་ཞིམ་འཐུལ་ཞིང་མེ་དྲོད་འཁྱིལ།།

མཐོང་ན་ཡེར་བའི་རི་ལུང་དག་ནི་ཁྲོ་བའི་ཟོལ་གྱིས་བྲག་ཆར་འཁོར།།

ནོར་དང་ལུག་ཁྱུ་དགྲང་བར་མི་ནུས་སྦྲ་ཆེན་འདབས་སུ་ཐང་མར་བརྡལ།།

ཨ་ཧོ་སྲིད་པའི་གཡང་ས་འདི་ན་སྲེད་ལྡན་མགུ་བའི་ལེགས་ཚོགས་འདུག།

བརྩེ་བའི་གཤིས་ལ་ལྷུན་ཆགས་མངའ་བའི་མེ་ཏོག་འཐུ་བའི་གཞོན་ནུ་མས།།

ཡིད་ལ་སུན་པའི་ངག་གི་ཚངས་དབྱངས་རི་སུལ་ཀུན་ནས་ལེན་ཏེ་འོང་།།

མཚར་སྣང་རླུང་གི་འཇམ་གཉེན་ནེན་མོས་སྒང་ཟོམ་ཀུན་ནས་རེག་ཅིང་སྒུལ།།

ཉམས་དགའི་ཞར་གྱི་འཚོ་བའི་ཕ་ཡུལ་དུ་ཞགས་ཉི་ལེར་ཕ་གིར་འདུག།

སྟོང་ཞིང་མཛེས་པའི་ཉག་ག་ཕལ་ཆེར་ཚོགས་དྲུག་ཆགས་པའི་ཆུ་ཀླུང་སྟེ།།

ཞེ་འདང་འཛར་བའི་ཟླ་འོད་ངོགས་སུ་གཟི་བྱིན་དང་བཅས་རབ་ཏུ་བྲུག།

གཡོ་མེད་འདོད་དགུའི་ཆར་ཆེན་དབབ་ཅིང་དེ་ཚེར་ང་ཡང་བཟི་བྱས་ཏེ།།

ཅི་ཡང་བདོག་པའི་ལུང་གཤོང་དེ་གར་འཁྲེང་བའི་བ་དན་ཡང་ཡང་དགྲེང་།།

ལྗོན་པའི་འདབས་ལོ་ཐུར་དུ་དཔྱང་པའི་རྩྭ་ཐང་མཛེས་པའི་བ་གམ་ནས།།

དམར་སེར་ཚོམ་གྱི་སྐྱེ་དངོས་སྣ་ཚོགས་རྟ་ནོར་ལུག་གི་རྨིག་པས་རྫི།།

མུར་རྒྱུན་འཕྱོ་བའི་གཙང་པོ་རབ་མེད་མཐའ་ཡས་རྒྱ་མཚོའི་འགྲམ་དུ་གཞུར།།

དེ་དང་ལྷན་དུ་ཉི་འོད་ལམ་ལམ་བསིལ་བའི་དོད་ཀྱིས་ཡུལ་ཀུན་འཕྲོས།

དེ་ལྟར་ན་ཡང་བདག་ནི་འདི་སྟེ་ཉམ་ཉེས་ལས་ཀྱི་གཡབ་མོའི་འོག།

སེམས་ཀྱི་ཟབ་སའི་སྣོད་བཅུད་དེ་དག་ཡེ་ནས་སྐྱུར་ཏེ་བས་མཐར་འགྲིམས།།

ཡིད་ལས་མ་འགགས་གནའ་བོའི་དུད་ཁྱིམ་སྣང་བའི་ངོས་སུ་འདུག་ན་ཡང་།།

རྟག་པར་རང་གི་རྩེད་གཞིས་དག་ནི་རྨི་ལམ་མིན་པས་མི་མཐོང་གི།

ད་ནི་ལམ་གྱི་བཞི་མདོ་རེ་ནས་ཡིད་སེམས་དྲན་པས་མི་གདུང་ངོ།།

ད་ནི་འཕྲུལ་འབྱམས་རྩིག་ལྡེབས་ངོས་ནས་སྨྲེང་བའི་ངལ་བ་མི་བྱེད་དོ།།

ད་སྟེ་མི་ཡུལ་དཀར་ངོགས་འདི་ནས་མི་ཚེ་འདི་དང་ཕྱམ་གཅིག་ཏུ།།

སྟོང་ཆེན་ཁམས་སུ་རྡོག་པོས་གནན་ཏེ་ནམ་ཞིག་དེ་རུ་ལྷུང་བར་ངེས།།

                                       ༢༠༡༧   ༥    ༡༠

བསམ་ཚུལ་ཕྲིས།

སྐུ་ཉིད་ཀྱི་གློག་འཕྲིན་ཁ་བྱང་གཞན་གྱིས་མཐོང་མི་ཐུབ། སྐར་རྟགས་ཅན་རྣམས་ངེས་པར་དུ་སྐོང་དགོས། *