དགེ་ཆོས། དུས་རབས་ཀྱི་རྡོ་རིང་།

།

།

མ་བཅོས་སེམས་ཀྱི་འདུན་པ་དཀར་པོ་མ་ཕམ་གཡུ་མཚོའི་གཏིང་ལས་ཟབ།

ལེཊ་བཤད་གསེར་གྱི་ཐིག་ཤིང་དྲང་པོ་གནམ་སའི་བར་ན་ལྷང་ངེར་བཙུཊ། །

བདེན་གཏམ་རིག་པའི་ཁྱེའུ་བསྙོལ་བར་ལ་རྒྱའི་སེམས་སྟོབས་བྲང་ན་རུམ། །

ས་ཡ་དྲུག་གི་ཀློང་ནས་ཐོན་ཅིང་འཛམ་གླིང་མཛེས་པའི་གདུགས་ལྟར་གྱུར། །

།

སྐུ་བརྗིད་མཛེས་སྡུག་མེ་ཏོག་ཆུང་ངུ་རིག་པ་འབྱུང་བའི་གྲོང་ལས་འཚར། །

ལྷན་སྐྱེས་ངག་རིག་འགྱུར་ཁུག་རེ་རེས་ལུས་ཅན་ཀུན་ལ་བདེ་དྲོད་བསྐྱིལ། །

མི་རིགས་ཤིག་གི་ལས་ལ་འཁྱུད་པའི་ལྕགས་སྒྲོག་དམར་པོ་སྤྱན་རྩར་ཕོག །

ལ་རྒྱའི་རེ་སྤོབས་ཡིད་ལ་བཅངས་ནས་ཕྲག་དོག་གཏམ་གྱི་གཡང་ལ་སྦྱར། །

།

ཀླད་མེད་རྒན་པོའི་ཞལ་ལ་མ་ཉན་རང་འདོད་སེམས་ཀྱི་ལྗིད་ཚད་གཞལ། །

རྣམ་རྟོག་བློ་མུག་རྒྱང་དུ་བསྐྲད་ནས་ལོ་རྒྱུས་གསར་རྙིང་བྲང་ཁོག་གཏོར། །

མིང་དུ་གྲགས་པའི་མཁས་པ་འགའ་ལ་བློ་བསྐྱེད་གསེར་ནག་ཁུ་བ་བསིལ། །

རང་དབང་སྤྱོད་པའི་བསྐལ་བ་ཕྲ་ཡང་རང་སེམས་གསོ་བའི་གླུ་རེ་བཞེས། །

།

བཀྲ་ཤིས་འཁྱིལ་གྱི་ཆོས་རའི་ནང་དུ་རིག་རྒོད་སྟོང་གི་སེམས་པ་དཀྲིགས། །

ན་ཚོད་མཉམ་པའི་ཆོས་གྲོགས་ཚོ་གཅིག་ཕྲག་དོག་གཏམ་གྱི་གཡང་ལ་སྦྱར། །

ཐལ་ཤལ་སྤྱོད་པས་རྡོ་དང་དབྱུག་གུ་ཇ་ཤིང་ལ་སོགས་མཚོན་ལྟར་དྲངས། །

དེ་ཡང་འགྲན་བྲལ་སྐྱེས་བུ་ཞིག་གི་ཁྱད་ནོར་ལྡན་པའི་དཔང་རྟགས་ཡིན། །

།

ཞབས་སེན་མུ་ཏིག་རེ་ཁ་ཟླུམ་པོ་དབུས་ཕྱོགས་ཆོས་ཀྱི་ཁམས་སུ་བསྒྱུར། །

དྲང་སྲོང་ཚོགས་ཀྱི་རྨི་ལམ་དུ་ཡང་འབྱོན་པ་དཀའ་བའི་རིག་པ་འབར། །

རིགས་ལམ་འཕྲུལ་གྱི་སྒྱོགས་རྡོ་རྣོན་པོས་མཁས་རྒུའི་དྲེགས་པ་ས་ལ་བསྒྱེལ། །

ལེགས་བཤད་ཆོས་ཀྱི་ར་བ་དཀར་པོར་དགེ་ཆོས་སྙན་པའི་རྡོ་རིང་བཞེངས། །

།

འཆད་པའི་འབབ་རྒྱུན་ཤིན་ཏུ་རིང་བས་རྨ་ཀླུང་བུ་མོའི་དཔལ་ལ་འགྲན། །

རྩོད་པའི་བརྒལ་བརྟག་ཤིན་ཏུ་མྱུར་བ་གནམ་ལྕཊ་སྔོན་མོའི་རྗེས་སུ་འགྲོ། །

རྩོམ་པའི་སྦྱོར་བར་རྒྱ་གར་མཁས་པ་ཐེ་ཀོར་གྱིས་ཀྱང་འགྲན་ཟླས་དབེན། །

ཕྱི་ནང་གྲུབ་མཐའི་གཞུང་ལུགས་ཀུན་ལ་ཐོགས་བྲལ་མཁས་པའི་རྩེ་མོ་བ། །

།

མཐོ་བརྗིད་དཔའ་བོའི་ཁྲི་ལ་འགྱིངས་པའི་སྐུ་ངོའི་གདོང་ལ་ཞལ་མ་འཛུམ། །

མཉམ་ཆུང་འཁོས་ཞན་སྤྲང་པོའི་ཚོགས་ལ་སྡང་བའི་སེམས་པ་ཡེ་ནས་སྤངས། །

མི་རིགས་འདི་ལ་རང་དབང་མཛའ་མོ་བག་མར་བསུ་བའི་ཐུཊ་འདུན་མཆོག །

བར་སྐོར་ནང་གི་བཟི་གཏམ་ཁྲོད་ནས་དམ་པའི་ཐུགས་ཀྱི་ཀློང་དུ་སྒྲིལ། །

།།

གནའ་མཁར་སྟོང་གི་བང་རིམ་ཁྲོད་ནས་ལོ་རྒྱུས་གསོན་པོའི་བྲང་ཁ་སློག །

ངལ་དུབ་སྐོམ་པའི་གདུང་བ་བསད་ནས་མྱ་ངམ་བྱེ་མའི་ཐང་སྟོང་འདུར། །

ཕྱི་རབས་དག་གི་སེམས་ན་བརྐོས་པའི་ཞབས་རྡུལ་རི་མོ་གསེར་ལྟར་གྱུར། །

ངེས་དོན་མཁས་པའི་མཚན་བཟང་ཕུལ་ཏེ་ཁྱེད་ལ་རྟག་ཏུ་སྙན་ངག་འབྲི། །

།

རྩྭ་རྐང་རྡུལ་ཕྲན་དུད་ཞགས་ཁྲོད་ནས་ལུས་ཀྱི་ངལ་དུབ་མཚམས་རེར་བསད། །

བཅུད་ལྡན་རོ་མཆོག་ཝུ་དཀར་ཀློང་ནས་རྩོམ་རིག་བམ་པོ་བྲག་ལྟར་བརྩིགས། །

ལས་ཀྱིས་ཐོབ་པའི་སྐབས་བསྟུན་དགའ་མར་འདོད་པའི་བྱ་བ་རྗེན་པར་བཏང༌། །

རབ་བྱུང་བཙུན་པའི་མཛད་རྣམ་དོར་ཏེ་སྔགས་སེམས་སྤྱོད་པའི་རྣལ་འབྱོར་བ། །

།

སྒྱུ་རྩོམ་ལེཊ་བཤད་རོལ་མོའི་ཁྲོད་ནས་ཆགས་སྡང་མིག་ཆུའི་ཕྲེང་བ་བགྲང༌། །

མཛངས་བླུན་སྐྱེ་བོ་སུ་ལ་ཐུག་ཀྱང་འཇིགས་བྲལ་ངག་གི་གད་རྒྱངས་འབར། །

མི་རིགས་ཤིག་གི་སྤྱི་ཚོགས་ཁྲོད་འདིར་གཟེངས་སུ་མཐོ་བའི་མཁས་སྙན་ཅན། །

རིས་མེད་སྤྱན་ཟུང་མཁའ་ལ་གཏད་པས་ཆོས་དང་ཆོལ་གསུམ་རྒྱན་དུ་དཔྱང༌། །

།

སྐུ་ངོ་བཙན་པོའི་ཞལ་ལྕེའི་འོག་ནས་ལས་རླུང་མཐོན་པོའི་དར་ཆ་བཅག །

མི་འདོད་བཞིན་དུ་ཕྲ་མ་བཏབ་པས་ཚེ་སྲོག་ཕྲ་མོའི་ཟུངས་ཐག་བཅད། །

ཞལ་གསུང་བཅུད་ཀྱི་གདམས་ངག་བམ་པོ་ཀླད་མེད་རྒན་པོས་མེ་ལ་བསྲེགས། །

མི་རིགས་ཤིག་གི་གྱོང་གུད་ལགས་ན་འགྲོ་ཀུན་འཕོང་བའི་གཞི་རུ་གྱུར། །

།

ངེས་དོན་གངས་རིའི་དཔའ་བོའི་མཚན་སྙན་དམ་པ་ཁྱེད་ཀྱི་སྐུ་ལ་མཛའ།

ངེས་དོན་གངས་རིའི་མཁས་པའི་སྙན་པ་དམ་པ་ཁྱེད་ཀྱི་གསུང་ལ་མཛའ།

ངེས་དོན་བོད་ཀྱི་བྱམས་བརྩེའི་རིན་ཐང་དམ་པ་ཁྱེད་ཀྱི་ཐུགས་ལ་མཛའ།

ངེས་དོན་ཡོན་ཏན་སྟོང་གིས་ཕྱུག་པའི་དམ་པའི་མཚན་འདི་ཤིན་ཏུ་སྙན། །

།

འགྲན་བྲལ་མཁས་པའི་ཡང་རྩེ་ཁྱེད་ནི་མི་མངོན་དག་པའི་ཀློང་དུ་གཟིམས། །

ལེགས་བཤད་གསེར་གྱི་བ་གམ་སྟེང་ན་ལོ་རྒྱུས་མཁན་པོས་འདག་ཞལ་བསྐྱོན། །

ཕྱི་རབས་རྩོམ་རིགས་མདུན་ལམ་རིང་མོ་མ་རྟོགས་འདམ་གྱི་འོབས་སུ་བརྫིས། །

ཡང་སྲིད་ཉི་གཞོན་མགོན་དུ་དྲངས་ཏེ་མུན་པའི་རྫོང་ཆེན་གཏོར་མཛོད་ཅིག །

།

དེ་ལྟར་སྙན་རྩོམ་འདབ་མའི་སྦུབས་ལས་སྣང་སེམས་རི་མོར་སིམ་པའི་གླུ། །

དབྱངས་སུ་གྱེར་ལ་འཇིགས་པ་བྲལ་བ་བླུན་པོ་དར་མའི་སྙིང་ཁམས་ཅན། །

བྱ་འཕུར་ཚང་གིས་ངག་རིག་འཁོར་ལོ་ཅུང་ཙམ་བསྒྱུར་བའི་རབ་བྱེད་འདི། །

ཞི་བདེའི་རྒྱ་མཚོའི་ཀློང་དུ་བསྙད་པ་མཛེས་སྡུག་འབར་བའི་གུར་ཁང་ནས། །

།