གྲུབ་ཆེན་རིན་པོ་ཆེ་དྲན་པའི་གདུང་དབྱངས།

 ། དུས་གསུམ་རྒྱལ་ཀུན་དགོངས་པའི་ཀློང་ཡངས་ཐུགས་རྗེའི་རང་རྩལ་ནུས་པའི་དཔལ།། ལྔ་བདོའི་དུས་ཀྱི་མཐའ་མ་འདི་རུ་བསྟན་འགྲོའི་བདག་པོ་ཤར་བ་ཉིད།། མཁས་གྲུབ་བྱེ་བའི་གཙུག་ན་མངོན་འཕགས་ནམ་མཁའ་རྒྱལ་མཚན་ཞེས་བྱ་བའི།། ཕྱི་ནང་གསང་གསུམ་མཛད་པའི་མཚོ་ལས་ཆུ་ཐིགས་ཙམ་ཞིག་འདི་རུ་འབྲི།།

ཁྱུང་དཀར་ཏི་སེ་རྒྱལ་བ་དཔལ་བཟང་པོར་རྗེས་དྲན་སྙན་ངག

། ༅༅།། ངེས་པ་དོན་གྱི་སྦས་པའི་རྣལ་འབྱོར་བ་ཆེན་པོ་ཁྱུང་དཀར་ཏི་སེ་རྒྱལ་བ་དཔལ་བཟང་པོ་མཆོག་ དགོངས་པ་བོན་དབྱིངས་སུ་གཟིགས་ནས་ལོ་འཁོར་གཅིག་འཁོར་བའི་རྗེས་དྲན་ སྙན་ངག་གི་མཆོད་པ། [ཡིག་འཕྲེང་དམར་པོ་འདིར་ནོན་དང་རྩོམ་ཡིག་དྲུག་ཅུ་ལྷག་ལ་གཟིགས་ཐུབ།] གསལ་བཤད། བོད་ས་མོ་ཕག་ལོའི་ཟླ་བ་དང་པོའི་ཡར་ཚེས་གཉིས་ཉིན་འདི་ག་སྡེ་དགེ་དཔོན་རྒན་དགོན་པའི་ཁྲི་འཛིན་ངེས་དོན་སྦས་པའི་རྣལ་འབྱོར་བ་ཆེན་པོ་ཏི་སེ་རྒྱལ་བ་དཔལ་བཟང་པོ་མཆོག་དགོངས་པ་བོན་དབྱིངས་སུ་གཟིགས་ནས། ད་ལོ་སྟེ་ལོ་ངོ་ཧྲིལ་པོ་གཅིག་འཁོར་བའི”རྗེས་དྲན་མཆོད་འབུལ”དུ།  དཔོན་རྒན་དགོན་པའི་༧ བླ་ཆུང་གཡུང་དྲུང་གཙུག་ཕུད་རྒྱལ་མཚན་དང་། དགོན་པའི་ཁོངས་མི་བཤད་སྒྲུབ་སློབ་གཉེར་བ་རྣམ་པ་དང་སྤྱི་ཚོགས་སློབ་གྲྭར་ཕེབས་པའི་གྲྭ་ཇོ་སྐྱ་གསུམ་གྱིས་ངག་རིག་གི་མཆོད་པ་ཞིག་མཉམ་འབུལ་ཞུ་རྒྱུའི་འཆར་གཞི་ལྟར་ལེགས་བསྒྲིགས་བྱས་པའོ།།                              རྩོམ་སྒྲིག་མི་སྣས་ཕུལ།

དྲིན་ཆེན་བླ་མའི་མཆོད་པ་བརྒྱད་ཀ་ཡར་དར།།

      ། གནམ་སའི་བར་ནས་འོད་མདངས་གཡོས་ཏེ་རིགས་དྲུག་སྤྱི་ལ་སྦྱིན་པ་སྟེར།། ཐར་པའི་ས་བོན་དྲོད་གཤེར་འཕྲད་ནས་མངོན་སངས་རྒྱས་པའི་ཡལ་འདབ་རྫོགས།། ས་གསུམ་ཐོགས་མེད་ཆིབས་ཁ་བསྒྱུར་ཏེ་རྣམ་གཞིའི་གདུལ་བྱ་དྲོད་ཀྱིས་བསྲོས།། མ་རིག་བདུད་སྡེའི་གཡུལ་ངོ་བཟློགས་ནས་བདེ་ཆེན་ཁ་ལོ་སྟོབས་ཀྱིས་བསྒྱུར།།

སེམས་ཀྱི་གདུང་བ་དང་ས་མཐའི་སྨིག་རྒྱུ།

སེམས་ཀྱི་གདུང་བ་དང་ས་མཐའི་སྨིག་རྒྱུ། (མཁས་པའི་དབང་པོ་༧རྗེ་བཙུན་ནམ་མཁའ་ཚུལ་ཁྲིམས་དཔལ་བཟང་པོ་མཆོག་ལ་རྗེས་དྲན་དུ།) / རང་བྱུང་མཛེས་སྡུག་འོད་ཀྱིས་འབར་བ་ས་འཛིན་སྒེག་མོའི་ཡང་རྩེ་ནས།། གནས་ལྔའི་བང་མཛོད་གཏེར་དུ་སྦྲུམ་པ་མུ་ཏིག་ཤེལ་དཀར་བུམ་པ་ཞིག།། གློ་བུར་མུན་པའི་བྲག་ལ་བརྡབས་པ་མི་རྟག་སྒྱུ་མའི་རང་གཟུགས་དེས།། རྟག་འཛིན་གདོན་གྱི་ཚང་དུ་ཡུར་བའི་བྱིས་པའི་ཁྱུ་ཚོགས་སྡུག་ཏུ་བཙུད།། / སྐྱེ་དང་འཇིག་པའི་ཕྲ་རག་ཡོད་ཚད་མིག་གི་དབང་པོས་མཐོང་བ་དང་།། སྐྱོ་དང་གདུང་བའི་སྒྲ་ཡི་རླབས་ཕྲེང་རྣ་བའི་གླེགས་བུར་འཛུལ་ན་ཡང་།། གནས་ལྔ་རིག་པའི་བང་མཛོད་རེ་རེ་གློ་བུར་མཇལ་བར་བསྐལ་བ་འདི།། བདག་ཅག་ས་མཐའི་འགྲུལ་བཞུད་པ་ལ་ཕྲག་ཏུ་ལྕི་བའི་གདུང་བ་ཞིག། ། / མཐའ་མེད་རི་ལུང་བྱེ་བའི་ཕྲེང་བ་ལྕགས་ཀྱིས་སྦྲེལ་བའི་མཚོ་མཐའ་ནས།། དྲན་པའི་གདུང་བ་མཆི་མའི་ཐིགས་པ་འགྲམ་པའི་ཚོས་ཀྱིས་སྐྱོར་བཞིན་དུ།། སྐྱེས་མཆོག་དམ་པའི་གཤེགས་ཤུལ་དེ་རུ་ཡི་གེའི་འཕྲེང་བ་སྤེལ་བ་འདི།། མགོན་པོ་གང་ལ་རྗེས་དྲན་མཚོན་པའི་དད་གདུང་མིག་ཆུའི་ཕྲེང་བ་ཡིན།། / མདོ་སྨད་ས་འཛིན་ཆོལ་ཁའི་རྟ་ཕོར་སྣང་སེམས་དབྱིངས་སུ་ཞིག་པའི་སྡེར།། རྒྱལ་བསྟན་རིན་ཆེན་ནོར་བུའི་ཕྲེང་བ་མཁའ་ལ་མཛེས་པའི་གོང་བུ་ཅན།། ལྷོ་གླིང་འཛིན་མའི་ཁྱོན་དུ་བརྗིད་ཅིང་ཁྱད་པར་འཆད་དང་རྩོད་པའི་སྡེ།། གངས་རི་དཀར་པོའི་ཀློང་ནས་མངོན་པ་དམ་པ་ཁྱེད་ཀྱི་བཀའ་དྲིན་ཡིན།། / བསླབ་པ་རིན་ཆེན་ཆུ་འཛིན་དཀར་པོ་མཁའ་ལ་དལ་གྱིས་འཕྱུར་བ་ལས།། ཟབ་ལམ་གདམས་ངག་འཆ༵ད་པའི་གྲུ་ཆར་སྐལ་ལྡན་ཞིང་དུ་བསིལ་བ་དང་།། ས་ཕྱོགས་ཀུན་ནས་སློབ་བུའི་ཁྱུ་ཚོགས་མ་བོས་ངང་གིས་འདུས་པར་གྱུར།། བསྟན་དང་འགྲོ་བའི་མཆོད་སྡོང་གང་གི་བཀའ་དྲིན་རྒྱ་མཚོ་སུ་ཡིས་གཞལ།། / ལི་ཁྲིའི་གོས་ཀྱིས་མཛེས་པར་བཀླུབས་པ་ཤེས་རབ་ལྷ་ཡི་གདེངས་ཀ་ནས།། ལུང་རིག་མགྲིན་པའི་སྒྲ་བརྒྱ་ལྡིར་ཞིང་རྩོ༵ད་པའི་གར་སྟབས་སྒྱུར་བའི་ཚེ།། ཕྱོགས་འཛིན་ལོག་རྟོག་བྲག་རིའི་ཕྲེང་བ་བྱེ་མའི་ཀླུང་དུ་ཐལ་བར་བརྫིས།། དམ་པ་གང་གི་མཚན་སྙན་ཐོས་ཙམ་རྒོལ་བའི་ཚོགས་རྣམས་རྒྱང་དུ་བཟུར།། / འཇམ་མཉེན་ཕྱག་གི་རོལ་མོའི་སྒྱུ་རྩལ་དྲུག་འགྱུར་དབྱངས་སུ་རྩེན་པ་ལས།། ལེགས་བཤད་རྩོ༵མ་གྱི་རྒྱ་མཚོའི་ཕྲེང་བ་ལུང་དང་རིགས་པའི་རྒྱན་གྱིས་སྤུད།། ཕྱི་རབས་བློ་གྲོས་རྟེན་དུ་བཞེངས་པ་གསུང་རབ་བམ་པོ་བྲག་ལྟར་བརྩིགས།། བདག་ཅག་སྐལ་ལྡན་ཞིང་འདིར་མཛེས་སོ་དམ་པ་གང་ལ་བཀའ་དྲིན་ཆེ།། / སྐྱེ་དང་འཇིག་པའི་འཁོར་ལོའི་ཕྲེང་བར་ཟུག་རྔུའི་སྡུག་བསྔལ་མྱོང་ངེས་ཀྱི།། འཁོར་བའི་རང་བཞིན་ཀུན་ཏུ་གྲུབ་པ་མིག་གིས་མཐོང་བ་ཉིད་ལགས་ཀྱང་།། མགོན་པོ་གང་གིས་མཉམ་མེད་བླ་མ་ཞིང་དུ་གཤེགས་པའི་ཚུལ་བཟུང་སྟེ།། བོན་འཆད་ངང་ནས་ཞི་བར་གཤེགས་སོ་རྒྱལ་བའི་སྲས་པོ་ཁྱེད་ལ་འདུད།། / རྟག་འཛིན་གདུལ་བྱའི་སྣང་ངོར་སྟོན་པ་དུས་ཀྱི་མཐའ་མའི་སྐབས་སུའང་།། “ང་བཞིན་བྱས་ན་ང་བཞིན་འོང་བའི་”ཐུགས་ཀྱི་དམ་ཚིག་གནད་དུ་ཚུགས།། བླ་ཆེན་དྲན་པའི་གསེར་གྱི་གདམས་ངག་ཉམས་དང་རྟོགས་པའི་རྒྱན་དུ་སྤྲོས།། བླ་མེད་ཐེག་པའི་ཁྲི་ལ་བཞེངས་པའི་གྲུབ་པའི་ཡང་རྩེར་ཁྱེད་ཉིད་འཕགས།། / མདོར་ན་འདིར་སྣང་སྒྱུ་མའི་འཁོར་ལོར་ཉིན་མཚན་ཡུག་གིས་འཁོར་བའི་བུ།། …

མཆོད་བསྟོད་ངག་གི་འགྱུར་ཁུགས།

། བཙད་པོའི་སྙིང་ཁམས་བདུད་ཀྱིས་དཀྲུགས་པས་རྒྱལ་བའི་བསྟན་ལ་སྲི་ཞུ་དམན། ། ཁྱི་སྤྱང་དར་མ་ངན་འབྲེལ་བྱུང་ནས་གཡུང་དྲུང་ལྷ་ཡི་དབུ་འཕང་སྨད། ། ས་ཡ་དྲུག་གི་བསོད་ནམས་ཤིག་ཏུ་དམ་པ་ཁྱུང་གི་གདན་ས་ནས། ། བདེན་པའི་རྒྱལ་ཁ་སླར་ཡང་འཐོབ་ཕྱིར་རིག་པའི་དཔའ་བོ་གང་ཉིད་བལྟམས། ། །