གཡུང་དྲུང་བོན་གྱི་རྒྱལ་བའི་བཀའ་རིིན་པོ་ཆེ་མདོ་སྨད་དུ་བྱུང་རིམ་ཟུར་ཙམ་གླེང་བ།

། རྒྱལ་རོང་བ་གཡུང་དྲུང་ཚེ་རིང་། ། སྔོན་གླེང་། །       སྤྱིར་གཡུང་དྲུང་བོན་གྱི་རྒྱལ་བའི་བཀའ་རིན་པོ་ཆེ་བྱུང་རིམ་གྱི་ལོ་རྒྱུས་ཁ་གསལ་གོ་བདེ་ཅན་ཞིག་མཐོང་རྒྱུ་དཀོན་སྟབས། གནས་སྐབས་སུ་འདི་རེད་ཅེས་ཁ་ཚོད་བཅད་ནས་བཤད་དཀའ་ནའང་། ད་ལྟ་ང་ཚོའི་མཇལ་ཡུལ་དུ་གྱུར་པའི་རྒྱལ་བའི་བཀའ་རིན་པོ་ཆེ་པོ་ཏི་བརྒྱ་དང་བདུན་ཅུ་དོན་བརྒྱད་ཅན་ཞིག་ཡོད་པ་དེ་ནི་གཙོ་བོ་རྒྱལ་རོང་རྒྱལ་ཁག་བཅོ་བརྒྱད་ཀྱི་སྤྱི་ཕུད་རྒྱལ་པོ་བོན་གྱི་བསྟན་སྦྱིན་ཆེན་མོ་ཆུ་ཆེན་རབ་བརྟན་རྒྱལ་པོ་དང་རྒྱལ་རོང་ཁྲོ་སྐྱབས་རྒྱལ་པོ་རྣམ་གཉིས་ཀྱིས་མཁས་དབང་ཀུན་གྲོལ་གྲགས་པའི་ཐུགས་བཀོད་བཞིན་སྦྱིན་བདག་གནང་བའི་ཆུ་ཆེན་ཟངས་པར་མ་དང་། ཁྲོ་སྐྱབས་ཤིང་པར་མ་ཞེས་བོན་རྒྱལ་རྣམ་གཉིས་ཀྱི་བཀའ་དྲིན་ལ་བརྟེན་ནས་བྱུང་བ་ཞིག་རེད་སྙམ། དེའི་ཕྱིར་ཁོང་རྣམ་གཉིས་ནི་བོན་གྱི་ལོ་རྒྱུས་ཁྲོད་དུ་མ་གླེང་ཐབས་མེད་ཅིག་ཏུ་གྱུར་ཡོད། སྐབས་དེར་རྒྱལ་རོང་ལ་གཡུང་དྲུང་བོན་གྱི་བསྟན་པ་འཛིན་པའི་མཁས་གྲུབ་གཉིས་ལྡན་གྱི་སྐྱེས་ཆེན་རབ་དང་རིམ་པ་གཅིག་རྗེས་གཉིས་མཐུད་དུ་བྱུང་ཡོད་པས། ཤར་ཕྱོགས་རྒྱལ་མོ་རོང་ནི་བོན་གྱི་བསྟན་པའི་འབྱུང་གནས་ལྟ་བུར་ཆགས་ཡོད། འོན་ཀྱང་བར་སྐབས་ཤིག་ལ་འཇིག་རྐྱེན་མང་པོ་ཞིག་བྱུང་བ་ལ་བརྟེན་ནས་ཉེ་བའི་བྱུང་རབས་ནང་དུ་བོན་གྱི་བསྟན་པ་ཆེས་ཉག་ཕྲ་བའི་དུས་སྐབས་ཞིག་ཏུ་གྱུར་ཡོད། ལོ་རྒྱུས་དང་རིག་གནས་སོགས་གང་གི་ཐད་ནས་སྟོང་ཆ་མང་པོ་ཞིག་ལྷག་ཡོད་པ་དེ་དག་མྱུར་སྐྱོབས་དང་ཁ་གསབ་བྱེད་དགོས་པ་ནི། ང་དང་ང་ལྟ་བུའི་རྒྱལ་རོང་གི་སློབ་གཉེར་བ་རྣམས་ཀྱི་ཕྲག་ལ་བབས་པའི་མ་འོངས་པའི་འོས་འགན་ཞིག་ཏུ་གྱུར་ཡོད། རབ་བརྟན་རྒྱལ་པོ་དང་ཁྲོ་སྐྱབས་རྒྱལ་པོ་རྣམ་གཉིས་ཀྱིས་བཀའ་འགྱུར་ཤིང་དཔར་ཅན་ཞིག་བཞེངས་ཡོད་པ་བོད་སྟོད་སྨད་བར་གསུམ་ཀུན་ཏུ་རྒན་རབས་རྣམ་པའི་ངག་རྒྱུན་དུ་བཤད་སྲོལ་ཡོད་པ་དང་། ཁོ་བོ་ནི་རྒྱལ་པོ་དེ་གཉིས་ལས་ཁྲོ་སྐྱབས་རྒྱལ་པོའི་མངའ་རིས་སུ་གཏོགས་པའི་སློབ་གཉེར་བ་ཞིག་ཡིན་ཕྱིར། རྒྱལ་ཕྱི་ནང་ཀུན་ལ་ཡོད་པའི་གྲོགས་པོ་མང་པོ་ཞིག་གིས་དེའི་སྐོར་ནས་དྲི་བ་གང་མང་ཞིག་བྱུང་སྟབས། ངས་ཀྱང་དེའི་སྐོར་ནས་རྒན་རབས་པ་རྣམས་ལ་དྲིས་པ་དང་དཔེ་ཆ་གང་འཚམས་བཀླགས་རྗེས་བློ་ངོར་ངེས་ཚུལ་ཙམ་ཞིག་ཞུ་འདོད་བྱུང་། ། ། དང་པོ། བོན་བསྟན་ཕྱི་དར་སྐབས་སུ་རྒྱལ་བའི་བཀའ་རིན་པོ་ཆེ་དར་ཚུལ། །       བོན་བསྟན་ཕྱི་དར་གྱི་དབང་དུ་བྱས་ན། དུས་རབས་བཅུ་གཅིག་པའི་སྟོད(སྤྱི་ལོ༡༠༡༧)དུ་སྤྲུལ་སྐུ་གཤེན་ཆེན་ཀླུ་དགས་ལྷོ་འབྲིག་མཚམས་མཐའ་དཀར་དུ་གཏེར་ཞལ་ཕྱེས་ནས་དར་འགོ་ཚུགས་པ་ཡིན་ལ།དེ་ཡང་དར་འགོ་ཚུགས་ཅེས་པ་ནི་རིམ་བཞིན་འཕེལ་རིམ་གྱི་དབང་དུ་བཤད་པ་ཡིན་གྱི་སྔར་མེད་གསར་དུ་བྱུང་བ་ཞིག་མ་ཡིན་ཏེ། བོད་རྒྱལ་ཁྲི་སྲོང་སྡེ་བཙན་གྱི་སྐུ་དུས་སུ་བོན་གྱི་བསྟན་པ་ལ་གོད་ཆག་ཡ་ང་བ་ཞིག་བྱུང་སྟེ་བསྟན་འཛིན་གྱི་སྐྱེས་ཆེན་མང་པོ་ཞིག་བོད་རུ་བཞི་རུ་བཞུགས་ཐབས་བྲལ་ནས་མཐའ་འཁོབ་རོང་ཁམས་རྣམས་སུ་གཤེགས་དགོས་བྱུང་ཡོད་པ་རེད། རྒྱལ་བའི་བཀའ་དང་བཀའ་བརྟེན་མང་པོ་ཞིག་མེས་བསྲེགས་ཆུ་ལ་བསྐུར་ཏེ་འཇིག་ཟིན་ཅིང་། ཟབ་བོན་ཁག་གཅིག་བྲག་ཕུག་དང་ལྷ་ཁང་མཆོད་རྟེན་སོགས་སུ་གཏེར་དུ་སྦས་དགོས་བྱུང་ཡོད། འོན་ཀྱང་རིག་འཛིན་གྲུབ་ཆེན་རྣམ་པས་སྨོན་ལམ་གྱི་ནུས་མཐུ་དང་བོན་འབངས་ཡོངས་ཀྱི་ལས་དང་བསོད་ནམས་ཀྱི་དབང་གིས། ཞང་ཞུང་སྙན་རྒྱུད་དང་མེ་རི་སོགས་ཞང་ཞུང་གི་བོན་སྐོར་དུ་མ་ཞིག་ཉམས་རྒུད་དུ་མ་སོང་བར་བོད་ཆེན་པོའི་ཐ་གྲུར་བཞུགས་པར་གསུངས་པས་སོ།།ཕྱིས་སུ་གསང་ཆེན་རིག་འཛིན་གོང་མ་རྣམས་ཀྱིས་གཏེར་དང་སྙན་རྒྱུད་ཅི་རིགས་ལ་བརྟེན་ནས་གཡུང་དྲུང་བོན་གྱི་རྒྱལ་བའི་བཀའ་དྲི་མ་མེད་པ་མདོ་སྔགས་རྫོགས་གསུམ་གྱི་བོན་སྡེ་རྣམས་ཕྱོགས་གཅིག་ཏུ་བསྡུས་པའི་དཔེ་ཚོགས་འདི་བྱུང་བ་ཡིན། དེ་ཡང་རིམ་བཞིན་འཕེལ་རྒྱས་སུ་སོང་བ་ཞིག་ཡིན་པ་ལས་དུས་གཅིག་ཏུ་བཀའ་གཏེར་སྙན་གསུམ་བྱུང་བ་མ་ཡིན་ལ། འདི་ཐོག་མར་བོན་གྱི་མཁས་གྲུབ་སུ་ཞིག་གིས་ཕྱོགས་གཅིག་ཏུ་བསྡུ་རུག་བྱས་པ་དང་། ས་གནས་གང་དུ་འབྲི་བཞེངས་བྱས་ཡོད་པའི་ལོ་རྒྱུས་ཁ་གསལ་ཅན་ཞིག་མཐོང་རྒྱུ་དཀོན་ཕྱིར། གོང་བཤད་བཞིན་འདི་རེད་ཅེས་ཐག་གཅོད་དཀའ་མོད། འོན་ཀྱང་སྔ་དུས་སུ་གཡུང་དྲུང་བོན་གྱི་བསྟན་པའི་བདག་པོ་མདོ་སྔགས་རྫོགས་གསུམ་གྱི་བརྒྱུད་པ་འཛིན་པའི་གསང་ཆེན་རིག་འཛིན་ཕལ་ཆེར་སྟོད་ཕྱོགས་སུ་བྱོན་ཡོད་པ་དང་། བོན་གྱི་གདན་ས་ཕལ་ཆེར་ཡང་སྟོད་ཕྱོགས་སུ་ཡོད་པར་མ་ཟད་དུས་རབས་བཅུ་བཞི་པའི་སྔོན་དུ་གཡུང་དྲུང་བོན་གྱི་བསྟན་པ་དར་རྒྱས་ཤིན་ཏུ་ཆེ་བའི་གདན་ས། གཙང་གཡས་རུ་དབེན་ས་ཁ། ཞུ་དབང་ལྡན་ལྷུན་འགྲུབ་སྒང་། སྤ་ལ་ཕུག རྨེའུ་དཔལ་ལྡན་བཟང་པོ་རི། གཤེན་དར་ལྡིང་སོགས་སུ་བཞུགས་པའི་མཁས་གྲུབ་དམ་པ་རྣམས་ཀྱིས་བཀའ་དང་བཀའ་བརྟེན་གྱི་ཁྱད་པར་དང་དབྱེ་བ། ས་མཚམས་དང་ངོ་བོའམ་མཚན་ཉིད་བཞག་སྟངས་སོགས་ལ་གཞིག་ན། རྒྱལ་བའི་བཀའ་དྲི་མ་མེད་པ་མདོ་སྔགས་སེམས་གསུམ་གྱིས་བསྡུས་པའི་བོན་སྡེ་རྣམས་ཕྱོགས་གཅིག་ཏུ་བསྒྲིགས་པའི་ཚོགས་དེ་བཞུགས་ཡོད་ཅེས་བཤད་ན་མི་འགལ་བར་སྙམ་མོ།། དཔེར་ན་བསྟན་པ་ཕྱི་དར་གྱི་སྐབས་སུ་ཤིང་རྟའི་སྲོལ་བཏོད་པ་དང་འདྲ་བའི་བྲུ་སྟོན་ནམ་མཁའ་གཡུང་དྲུང་གིས་སངས་རྒྱས་ཉེས་པའི་དྲི་མ་ཟད་པས་གསུངས་པ་བཀའ་ལ། སེམས་དཔའ་དང་རྟོག་གེ་ཕལ་པས་མཛད་པ་བརྟེན་པ་ཡིན་ཞེས་གསུངས་པས། སྐྱོན་ཀུན་ཟད་དང་ཡོན་ཏན་ཀུན་ལྡན་གྱི་སྟོན་པས་གསུངས་པའི་བོན་ཐམས་ཅད་བཀའ་ཡིན་དགོས་པ་དང་། དེ་ལ་བརྟེན་ནས་རྗེས་འཇུག་གཤེན་རབ་རྣམས་ཀྱིས་བཀའི་དགོངས་པ་ཚུལ་བཞིན་དུ་འགྲེལ་ནས་གསུངས་པའི་བོན་རྣམས་ནི་བཀའ་བརྟེན་ཡིན་ཞེས་པའི་དོན་ཡིན། ཁོ་བོས་སྔ་རབས་ཀྱི་མཁས་པའི་རིགས་ལམ་འགྲོ་ཕྱོགས་དང་བོན་འཆད་ཚུལ་དཔེ་ཆ་རྩོམ་སྟངས་དང་། …

ལྟུ་རུ་ཞེས་པའི་ཐ་སྙད་ཀྱི་བརྗེད་ཐོ།

། དགེ་བློ་གྲོས། རྔ་བ། །   ་་་་་་་་་  སྤྱིར་ཐ་སྙད་ཀྱི་འགྱུར་བ་ལ་དེ་ཙམ་ཐུགས་སྣང་མི་མཛད་པ་ནི། རིག་གནས་ཀྱི་ངོས་ནས་བལྟས་ན་གྱོང་གུད་ཆེན་པོ་ཞིག་ཡིན་པར་མ་ཟད། ཐ་སྙད་འདིའི་རིགས་ཀྱི་བྱུང་རིམ་དང་གོ་དོན་སོགས་ལ་མནོ་བསམ་ཅི་ཡང་མ་བཏང་བར་བཞག་པ་ཡིན་ན། ནམ་ཞིག་མག་མོག་ནས་རབ་རིབ་དང་། རབ་རིབ་ནས་གོ་དཀའ་བའི་གནས་སུ་གྱར་ཏེ། བོད་རང་གི་ཐ་སྙད་ཅིག་ཡིན་མིན་ལའང་དོགས་པ་ཟ་བའི་ཉིན་མོ་ཞིག་མི་སླེབ་པའི་ངེས་པ་མེད་པས། ཐ་སྙད་ཀྱི་འགྱུར་བ་ལ་ངོས་ཟུར་གཉིས་ཀ་ནས་ཐུགས་གཞིག་ནན་མོ་གཏང་རྒྱུ་གལ་ཆེན་སྙམ། དེ་བས་འདིར་རྗེ་རིན་པོ་ཆེས་རང་ལ་གསལ་འདེབས་གཞན་ལ་ཕན་ཕྱིར་དུ་གསུང་པ་བཞིན། བརྗེད་ཐོའི་ཚུལ་དུ་སྨྲ་བའི་ལྕེ་འགུལ་བར་བྱའོ།། ། ་་་་་་་་་ ཕྲན་གྱིས་ད་སྔ་དཔེ་ཀློག་གི་ཁྲོད་ནས་མཐོང་བ་ལྟར་ན། ལྟུ་རུ་ཞེས་པའི་ཐ་སྙད་འབྱུང་སའི་དཔེ་ཆ་སྔ་ཤོས་དེ་དྲང་སྲོང་ཡེ་ཤེས་རྒྱལ་མཚན་གྱི་འདུལ་འགྲེལ་ཡིན་ཞིང་། གཞུང་དེ་ཉིད་ལས། 1ཤ༢༠༡<<སྟོད་ལུགས་ལས་ཀྱང་། ལྟུང་ཏུ(ལྟུ་རུ)དང་བར་བུར་གྱི་སྣོད་གཉིས་གསུངས་པས། ལྟུ་རུ་གོང་བཞིན་ལ>> ཞེས་པར་གཞིགས་ན་དེའི་ཚིག་མགོར་པད་ཁུག་གི་སྐོར་གསུངས་ཡོད་པས་ལྟུ་རུ་ཞེས་པ་པད་ཁུག་རང་ལ་གོ་དགོས་པ་མིན་ནམ་སྙམ། དེའི་ནང་དུ་དཔེ་ཆ་དང་ལྷ་སྐུ་རྟེན་ཆ་རྣམས་བཅུག་པ་ལས་གཞན་མཁོ་བའི་ཡོ་བྱད་ཀྱི་རིགས་རྣམས་མི་བྲུབ་པར་གསུངས། སྤྱིར་མཁན་པོ་མི་བརྗེད་པའི་རྟགས་བཞིའི་སྐོར་ཆེན་དགོངས་པ་རབ་གསལ་གྱི་མདུན་དུ་སྡོམ་པ་བླངས་པ་ནས་ཡོད་པ་སྨོས་མི་དགོས་ནའང་། ཐོག་མར་དཔེ་ཆ་གང་དུ་རྟགས་བཞིའི་སྐོར་གསུངས་ཡོད་མེད་སོགས་བསྙད་དཀའ། གཞན་བསམ་གཞིག་གཏང་དགོས་པ་ཞིག་ནི། ཡེ་རྒྱལ་གྱི་འདུལ་འགྲེལ་དུ། 2ཤ༡༩༤<<མཁན་པོ་མི་བརྗེད་པའི་རྟགས་བཞི་ལས་ཀྱང་ཞྭའི་མདངས་སྔོན་པོ་ཟེར>>ཞེས་པའི་ཚིག་ལ་བལྟས་ན།  དེའི་ཡར་སྔོན་ནས་མཁན་པོ་མི་བརྗེད་པའི་རྟགས་བཞི་ངོས་བཟུང་ཡོད་པར་ཤེས་ཐུབ་པར་མ་ཟད། ཞྭའི་མདངས་སྔོན་པོ་བྱེད་པ་དེ་ཡང་མཁན་པོ་མི་བརྗེད་པའི་རྟགས་བཞིའི་ནང་གི་གཅིག་ཡིན་པར་རྟོགས་ཐུབ། དྲང་སྲོང་ཡེ་ཤེས་རྒྱལ་མཚན་ཁོང་གིས་རྟགས་བཞི་ལས་ཞྭའི་མདངས་སྔོན་པོ་ཕུད་པའི་གཞན་གསུམ་པོ་གང་ཞིག་ཏུ་ངོས་བཟུང་ཡོད་མེད་དང་ལྟུ་རུ་དེའི་ནང་གི་བྱེ་བྲག་ཅིག་ཏུ་ངོས་བཟུང་མིན་ཁ་ཚོན་བཅད་ནས་སྨྲ་མི་ཐུབ་ནའང་། བྲུ་རྒྱལ་བ་གཡུང་དྲུང་གིས་མཛད་པའི་འདུལ་བརྒྱུད་མེ་ཏོག་འཕྲེང་བ་རུ།  ལྟུ་རུ་ཞེས་པ་མཁན་པོ་མི་བརྗེད་པའི་རྟགས་བཞིའི་བྱེ་བྲག་ཅིག་ཡིན་པ་གསལ་བ་ལྟར་ན། འདི་ནས་ཡར་བརྩིས་པའི་ལོ་བདུན་བརྒྱ་ལྷག་ཅིག་གི་མཚམས་སུ་ལྟུ་རུ་ཞེས་པ་དེ་རྟགས་བཞིའི་བྱེ་བྲག་ཅིག་ལ་ངོས་བཟུང་ཡོད་པ་སྟེ། ཡེ་རྒྱལ་གྱི་འདུལ་བརྒྱུད་མེ་ཏོག་འཕྲེང་བ་རུ་མཁན་པོ་མི་བརྗེད་པའི་རྟགས་བཞི་སོ་སོར་བགྲངས་ཏེ། 3ཤ༡༦༣<<ཤམ་ཐབས་ཀྱི་ཀ་བ་སྔོན་པོ། ཐང་བའི་སྣེ་ཚངས་སྔོན་པོ། ལྟུ་རུ་སྔོན་པོ། གདིང་བ་སྔོན་པོ་དང་བཞི་ཡིན་གསུངས>>ཞེས་ལྟུ་རུ་ཞེས་པའི་ཐ་སྙད་དངོས་སུ་བསྟན་ཡོད། ཡང་ཅིག་བཤད་ན། དེའི་ཚིག་མཇུག་གི<<ཡིན་གསུངས>>ཞེས་པ་གཅིག་པུས་ཀྱང་བྲུ་རྒྱལ་གྱི་ཡར་སྔོན་དུ་མཁན་པོ་མི་བརྗེད་པའི་རྟགས་བཞི་སོ་སོ་ནས་བགྲངས་ཡོད་པར་ཚིག་ཐག་བཅད་ནས་བསྙད་ཆོག་སྙམ། རེད་དེ། དེའི་སྔོན་དུ་བགྲང་མཁན་དེ་དྲང་སྲོང་ཡེ་ཤེས་རྒྱལ་མཚན་ཡིན་མིན་དང་གཞན་མཁས་པ་སུ་ཞིག་གིས་ཐོག་མར་གསུངས་ཡོད་མེད་ནི་སུ་ལའང་རོ་འཛིན་གཡོ་བའི་སྤོབས་པ་དབེན། ལར་མཁན་པོ་མི་བརྗེད་པའི་རྟགས་བཞིའི་མཚོན་དོན་ནི་རྟ་མག་མོག་གི་སྤུ་བཞིན་སྣ་ཚོགས་སུ་འདོད་ཀྱང་། ཡང་སྙིང་ཅི་ཞིག་ཡིན་མིན་ལོ་རྒྱུས་ཁུངས་བཙན་དག་ནས་ཁ་གྲགས་པ་བཞིན་ཏེ། འདུལ་བ་སྨད་ལུགས་ཀྱི་སྡོམ་རྒྱུན་བོན་ལ་ཐུག་པའི་བཀའ་རྟགས་ཡིན་པར་གསལ་བས་དེའི་སྐོར་རྒྱས་བཤད་ཀྱི་ངལ་བ་དང་དུ་ལེན་པ་མི་བྱ་ཞིང་། རོབ་ཙམ་མོལ་ན། ཕ་བོན་མ་བོན་ཡིན་པའི་ཡ་ཟི་བོན་སྟོན་ནམ་བླ་ཆེན་དགོངས་པ་རབ་གསལ་གྱི་མདུན་ནས་གཞན་ཕྱོགས་འདུལ་འཛིན་པ་ཀླུ་མེས་སོགས་ཀྱིས་སྡོམ་པ་བླངས་པ་ནི་ཀུན་ལ་མཐུན་ཞིང་། དྲང་སྲོང་ཡེ་རྒྱལ་གྱི་འདུལ་བ་ཏི་ཀ་ལས། 4ཤ༡༨༣<<སྟོད་ལུགས་ལས་ཞྭ་ཐལ་སྦྱོར་མ་དང་རྒྱབ་ལ་ནམ་བྱེད་སྐད། དེ་ལྟར་བོད་ལ་སྣ་རིང་བྱེད་པ་ནི། བླ་ཆེན་མི་ཐུར་གྱིས་མཁན་བུ་མ་བདུན་པ་ལ་གནང་བའི་ཞྭ་ཡིན་པར་གསལ་ཏེ།  མཁན་པོ་མི་བརྗེད་པའི་རྟགས་བཞི་ལས་ཞྭའི་མདངས་སྔོན་པོ་ཟེར་བས་ཞྭའི་རྩེ་ལ་གཉིས་སྔོན་པོ་བྱེད་པའོ།། >>ཞེས་དང་། གཏམ་རྒྱུད་གསེར་ཐང་དུའང5ཤ༦༤<<བུ་སྟོན་ཆོས་འབྱུང་དུ་བླ་ཆེན་གྱིས་ཀླུ་མེས་འགྲོ་ཁར་བོན་པོའི་ཞྭ་འོབ་ཞུ་ཁོག་ནས་ས་སེར་བཏབ་པ་ཞིག་གནང་ནས་འདི་རྟག་ཏུ་གྱོན་གསུངས་པར་བྲིས། དེས་ན་ཞྭ་དེ་བོན་ཞུ་རྣ་ལེབ་བཅད་པ་ལ་ཚོས་སེར་བསྒྱུར་བ་ཞིག་ཡིན་པར་གསལ་ལ། འབྲུག་པད་དཀར་གྱིས། བླ་ཆེན་གྱིས་ཞྭ་གནང་བ་དེ་ནས་བཟུང་ཞྭ་སེར་གྱོན་པའི་སྲོལ་བྱུང་གསུངས། དེས་ན་རང་རེའི་ཞྭ་སྣེ་རིང་གི་ཕྱི་མོ་དེ་བོན་ཞྭ་ཡིན་པར་གསལ>>ཞེས་བྲིས་པ་གཅིག་པུས་ཀྱང་། རྟགས་བཞིའི་མཚོན་དོན་ཅི་ཞིག་ཡིན་མིན་དང་སྨད་འདུལ་གྱི་ཁུངས་གང་ལ་ཐུག་མིན་སོགས་ནི་ཤེས་ཐུབ་སྙམ།   ། ་་་་་་་་་་ ལྷག་ཏུ་ལྟུ་རུ་ཞེས་པའི་ཐ་སྙད་ཀྱི་གོ་དོན་ལ་མནོ་བསམ་མང་དུ་གཏང་རྒྱུ་ཡོད། སྤྱིར་ལྟུ་རུ་དང་། རྟོལ་བུ། ལྟུར་བུ། གཏུར་བུ། གཏོར་བུ་སོགས་ཀྱི་མིང་གཞི་ཏ་ཡིག་ལས་གྲུབ་པས་ཕན་ཚུན་འབྲེལ་ཡོད་ཅིག་ཡིན་པར་ཤེས་ཐུབ་པས་མི་ཚད། གཅིག་ལས་གཅིག་བྱུང་བའང་བསྙོན་དུ་མེད། ཐ་སྙད་དེ་དག་ཐོག་མར་ལྟུ་རུ་ལས་བྱུང་བ་ཡིན་པ་ནི། ལྟུ་རུ་ཞེས་པའི་ཐ་སྙད་དཔེ་གཞུང་ཁུངས་དག་དང་། ཡང་ན་ལྟོས་འཇོག་གིས་དཔེ་རྙིང་དུ་མཐོང་རྒྱུ་ཡོད་པ་ལས། གཞན་རྟོལ་བུ་སོགས་ནི་ཕྱིས་འབྱུང་གི་དཔེ་གཞུང་མ་གཏོགས་སྔ་ཤོས་ཀྱི་དཔེ་གཞུང་དུ་མཐོང་རྒྱུ་མེད་གཤིས། ཐ་སྙད་དེ་དག་གི་རྩ་བའི་ཁུངས་ལྟུ་རུའི་སྒྲ་གཟུགས་འདི་ཉིད་ཡིན་ཞེས་བསྙད་ན་ཞུན་ཐར་ཆོད་པའི་གཏམ་ཞིག་ཏུ་འདོད་ཀྱིན་ཡོད་ལ།   ཐ་སྙད་དེ་དག་གི་རྩ་བའི་མིང་གཞི་ལ་འགྱུར་བ་སོང་མེད་ནའང་། མགོ་ཅན་དང་འཕུལ་རྟེན་སོགས་ལ་འགྱུར་བ་སོང་ཡོད་པ་ནི་བོད་ཀྱི་ཐ་སྙད་དག་གི་སྤྱིའི་འགྱུར་ཚུལ་ཞིག་ཡིན་ཞིང་། དེ་ཡང་ཡུལ་ལུང་སོ་སོའི་ངག་གི་བརྗོད་པ་མི་འདྲ་བའི་རྐྱེན་གྱིས་ཐ་སྙད་གང་དེའི་ཡིག་གཟུགས་ལ་འགྱུར་བ་ཐེབས་བཞིན་ཡོད་ལ།  ཡིག་གཟུགས་ཀྱི་འགྱུར་བ་རེ་རེ་ནི་ཐ་སྙད་མི་འདྲ་བ་འབྱུང་བའི་རྩ་བའི་རྒྱུ་རྐྱེན་ཉག་གཅིག་ཡིན། ར་དང་ལ་གཉིས་བརྗེ་སྤོར་གྱིས་བྲིས་པ་ཡོད་ལ། དགེ་ཆོས་ཀྱིས་ཀྱང་ཡུལ་གྲུ་དུ་མའི་སྐད་ལ་ར་དང་ལ་གཉིས་ཕན་ཚུན་རྟག་ཏུ་འགྱུར་བས། ཨ་མདོའི་ཡུལ་སྐད་མང་ཆེ་བར་གསལ་པོ།  ཡོལ་བ།  གསོལ་བ་འདེབས་སོགས་ལ། གསར་བོ། ཡོར་བ། གསོར་ལ་འདེབས་སོགས་སུ་བརྗོད་པས། ར་ས་ཡང་བར་སྐབས་སུ་ལ་སར་སོང་། ཞེས་གསུངས་པར་གཞིགས་ན། ལྟུ་རུ་ལས་རྟོལ་བུ་དང་ལྟུར་རུ་གཉིས་ཀ་འགྱུར་བ་ཡིན་པ་ནི་ཐ་སྙད་དེ་དག་གི་བྱུང་བར་སྔ་ཕྱི་ཡོད་པས་རྟོགས་ཐུབ་པས་མི་ཚད། འགྱུར་ཚུལ་དེ་ཡང་འབྲེལ་མེད་ཅིག་མིན། སྤྱིར་བཙན་པོའི་སྐབས་དང་། ཡིག་རྙིང་འགར་ར་སྡེ་ཡན་གྱི་གསལ་བྱེད་སྡེ་བ་སོ་སོའི་དང་པོ་དང་གཉིས་པ་རེས་མོས་སུ་བྲིས་པ་མང་བ་སྟེ། དཔེར་ན། ཁལ་དང་ཀལ། གཅིག་དང་གཆིག མན་ཅད་དང་མན་ཆད། གཏོགས་པ་དང་གཐོགས་པ། བཏབ་པ་བཐབ་པ། ཙེག་དང་ཚེག ར་ས་དང་ལ་ས། ཆི་ཟིག་དང་ཅི་ཞིག་སོགས་བྲིས་པ་བཞིན་འདིར་ཡང་ལ་མགོ་ཅན་དེ་ར་མགོ་ཅན་དུ་བྲིས་པ་མིན་ནམ་སྙམ་ལ། དེ་བཞིན་གཏུར་བུ་དང་གཏོར་བུ་གཉིས་ཀའང་། ཐོག་མའི་ལྟུ་རུ་ལས་རིམ་གྱིས་འགྱུར་བ་ཡིན་པར་ཤེས་ཐུབ་པ་སྟེ།  ཐ་སྙད་གང་དེ་ངག་ནས་རྗོད་སྐབས་མིང་གཞིའི་སྒྲ་གདངས་དག་པར་བཀླགས་པའི་དབང་གིས་ཐ་སྙད་ལ་འགྱུར་བ་སྣ་ཚོགས་ཤིག་འགྲོ་བཞིན་ཡོད། དཔེར་ན། སྤུ་ཧྲེངས་ལ་པུ་རངས་དང་། སྤུར་རྒྱལ་ལ་པུར་རྒྱལ། སྤུར་ལ་པུར། བྲག་ཕུག་ལ་བག་ཕུག    དབྲད་ལ་དབད་སོགས་བརྗོད་པ་ལ་བརྟེན་ནས་སྒྲ་གདངས་ཇི་བཞིན་བྲིས་པ་མང་ཞིང་། ཐ་སྙད་གང་དེའི་མིང་གཞིའི་སྒྲ་གདངས་དག་པར་བཀླགས་པས་རྐྱེན་གྱིས་སྒྲ་གཟུགས་གཉིས་ཀར་འགྱུར་བ་ཐེབས་པ་བཞིན་བཤད་མ་ཐག་པའི་གཏོར་བུ་དང་གཏུར་བུ་གཉིས་ཀ་ཡང་དེ་བཞིན་འགྱུར་བ་ཡིན་པར་བསྙོན་དུ་མེད། གཞན་ལྟུ་རུ་དང་རྟོལ་བུ། གཏུར་བུ་དང་གཏོར་བུ་སོགས་ཀྱི་དབྱངས་ལ་ཨུ་ལྡན་དང་ཨོ་ལྡན་ཡིན་མིན་གྱི་ཁྱད་པར་སྲིད་དམ་སྙམ་ན། དེ་ཡང་དོན་དུ་ཨ་ཕྲེང་གི་གུ་དང་འགྲེང་བུ་གཉིས་ལ་རྒྱུ་འབྲས་ཀྱི་འབྲེལ་བ་ཡོད་ལ། རྣམ་པ་གཅིག་ཏུ་ན། སྐྱེ་གནས་གཅིག་པའི་དབང་གིས་ཁྱད་མེད་དུ་བྲིས་པའང་ཡིན་སྲིད། གི་གུ་དང་འགྲེང་བུ་ཁྱད་མེད་དུ་བྲིས་པ། དིང་སང་ལ་དེང་སང་དང་། དེ་བཞིན་ཞབས་ཀྱུ་དང་རྣ་རུ་གཉིས་ཀྱང་ཁྱད་མེད་དུ་བྲིས་པ་ཡོད། དཔེར་ན། ཨུ་རྒྱན་ལ་ཨོ་རྒྱན་ཞེས་བྲིས་པས་འདིར་གཏུར་བུ་དང་གཏོར་བུ་སོགས་ཀྱི་འབྲི་སྟངས་ཀྱང་དེ་ལས་མ་འདས་པ་རྟོགས་ཐུབ། རེད་དེ། ཐ་སྙད་དེ་དག་གི་ཚིག་གྲོགས་བུ་དང་རུ། གཞན་གས་འཕུལ་སོགས་ཀྱི་སྐོར་ཟིན་ཏིག་གཞན་དུ་འབད་པར་བྱ་ངེས་པས་དེར་བལྟ་བར་བྱ། སྤྱིར་ཐ་སྙད་གཅིག་ལ་ཡུལ་ལུང་སོ་སོའི་ཀློག་སྟངས་མི་འདྲ་བའི་དབང་གིས་ཡི་གེར་འབྲི་དུས་སྒྲ་གདངས་ཇི་བཞིན་བྲིས་ཏེ་ཐོག་མའི་ཐ་སྙད་ཀྱི་འབྲི་སྟངས་ལ་མནོ་བསམ་ཅི་ཡང་མ་བཏང་བས་ལན་པ་ཡིན་སྙམ།  སྤྱིར་ན་ཐ་སྙད་གང་དེར་ཐོག་མའི་སྒྲ་གཟུགས་ངེས་ཅན་ཞིག་ཡོད་ངེས་པས། ཐ་སྙད་གང་དེའི་ཐོག་མའི་སྒྲ་གཟུགས་ཅི་འདྲ་ཡིན་མིན་འཚོལ་ཞིབ་བྱས་ཏེ། ཇི་ལྟར་འགྱུར་བ་སོགས་ཉི་ཚེ་བའི་རྒྱུ་མཚན་ཙམ་ལ་བརྟེན་ནས་མཐའ་སྡོམ་དགོད་རྒྱུ་མ་ཡིན་པར་བདེན་དཔང་ངེས་ཅན་ཞིག་གི་འོག་ནས་ཡུས་ཆེ་བའི་གཏམ་ཞིག་བཤད་རྒྱུ་ནི་ཨ་ཀྱང་ནས་གལ་ཆེའོ།། ། ་་་་་་་་་་་་ ལྟུ་རུ་ཞེས་པ་པད་ཁུག་རང་ཡིན་ཞེས་རྦད་ཀྱིས་བཅད་དེ་བསྙད་ན། བཤད་སྔ་བའི་སྐྱོན་ཞིག་མིན་ནམ་སྙམ་ཡང་། རེ་ཞིག་ཁེངས་པ་མ་བསྐྱུངས་བར་ཙམ་ལས་གཞན་རྔོ་ཐོགས་པའི་གཏམ་གསར་བ་ཡིན་མིན་ནི་མ་འཚལ། དར་རྒྱས་གསལ་སྒྲོན་དུ་མཁན་པོ་མི་བརྗེད་པའི་རྟགས་བཞི་ལས་རྟོལ་བུ་ཞེས་པ་དང་། གླེང་གཞི་བསྟན་པའི་འབྱུང་ཁུངས་སུ་མཁན་པོ་མི་བརྗེད་པའི་རྟགས་བཞི་ལས་ལྟུར་རུ་ཞེས་པ་ཡང་པད་ཁུག་ཏུ་ངོས་འཛིན་པ་ལས་འོས་མེད་སྙམ། (དར་རྒྱས་གསལ་སྒྲོན་དང་། འདུལ་བརྒྱུད་མེ་ཏོག་འཕྲེང་བ། གླེང་གཞི་བསྟན་པའི་འབྱུང་ཁུངས་སོགས་ཀྱི་མ་ཕྱི་གཞན་དུ་དེ་ལྟར་བྲིས་མིན་དཔྱད་པའི་གནས) དེས་ན། མཁན་པོ་མི་བརྗེད་པའི་རྟགས་བཞི་ངོས་འཛིན་སྟངས་མི་འདྲ་བ་ཡིན་ནམ་ཟེར་ན། བདེན་པའི་གཏམ་སྟེ། བྲུ་རྒྱལ་དང་སྤ་བསྟན་རྒྱལ་བཟང་པོ། ཁྱུང་པོ་བློ་གྲོས་རྒྱལ་མཚན། ཀུན་མཁྱེན་ཉི་མ་བསྟན་འཛིན། དཔལ་འབྱོར་བཟང་པོ་སོགས་ཀྱིས་རྟགས་བཞི་ངོས་འཛིན་སྟངས་ལ་བལྟས་ན་མི་འདྲ་བ་ཤེས་ཐུབ། བྲུ་རྒྱལ་གྱིས་རྟགས་བཞིའི་ནང་དུ་ཞྭ་བརྩིས་མེད་ལ། ཞྭའི་ཚབ་ཏུ་པད་ཁུག་གམ་ལྟུ་རུ་བགྲངས་ཡོད་པ་ལས་གཞན་གདིང་བ་དང་། ཐང་བའི་སྣོལ་ཚང་། ཤམ་ཐབས་གསུམ་པོ་ངོས་འཛིན་སྟངས་སྤྱི་དང་འདྲ་བར་མ་ཟད། ཁྱུང་པོ་བློ་གྲོས་རྒྱལ་མཚན་གྱིས་ལྟུ་རུ་ལ་ལྟུར་རུ་ཞེས་རྟེན་ཡིག་ར་ཡོད་མེད་ཀྱི་ཁྱད་པར་ཙམ་ལས་བྲུ་རྒྱལ་གྱི་ལུགས་དང་མཐུན་པར་བྱས་ནས་རྟགས་བཞི་ངོས་བཟུང་ཡོད། སྤ་བསྟན་རྒྱལ་བཟང་པོའི་དར་རྒྱས་གསལ་སྒྲོན་དུ། 6ཤ༡༥༣<<འགྲོ་འདུག་གི་དུས་སུ་ང་དྲན་པར་གྱིས་གསུངས་ནས། རྟོལ་བུ་སྔོན་པོ་བྱེད་པ་དང་། རྟག་ཏུ་ང་སྤྱི་གཙུག་ཏུ་དྲན་པར་གྱིས་གསུངས་ནས། ཞྭའི་མདངས་སྔོན་པོ་བྱེད་པ་དང་། གསོ་སྦྱོང་གི་དུས་སུ་དྲན་པར་གྱིས་གསུངས་ནས། ཐང་བའི་མདངས་སྔོན་པོ་བྱེད་པ་དང་། ལྡང་ཉལ་གྱི་དུས་སུ་དྲན་པར་གྱིས་གསུངས་ནས། ཤམ་ཐབས་ཀྱི་ཀ་བ་སྔོན་པོ་བྱེད་པའོ།། >>ཞེས་པད་ཞུ་དང་། རྟོལ་བུའམ་པད་ཁུག ཐང་བའི་མདངས་སྔོན་པོ། ཤམ་ཐབས་སྔོན་པོ་ཞེས་པ་ལས་གདིང་བ་རྟགས་བཞིའི་ནང་དུ་བགྲངས་མེད། མཁན་ཆེན་ཉི་མའི་འདུལ་བའི་རྣམ་བཤད་ལས། 7ཤ༢༣༣<<མཁན་པོའི་རྟགས་བཞི་ནི། ཤམ་ཐབས་ཀྱི་ཀ་བ་སྔོན་པོ། ཐང་བའི་སྣོལ་ཚང་སྔོན་པོ། པད་ཞུའི་དབུ་རྩེ་སྔོན་པོ། གདིང་བའི་གཡུ་མདངས་སྔོན་པོ>>ཞེས་རྟགས་བཞིའི་ནང་དུ་པད་ཁུག་གམ་ལྟུ་རུ་བགྲངས་མེད་པར་སོགས་ལ་བལྟས་ན། རྟགས་བཞི་ངོས་འཛིན་སྟངས་ལ་རྩ་བའི་ཆ་ནས་མི་འདྲ་བའི་ལུགས་གཉིས་ཡོད། དེ་ཡང་ཡེ་རྒྱལ་དང་སྤ་བསྟན། མཁན་ཉི་མ་གསུམ་གྱིས་ཞྭ་དེ་རྟགས་བཞིའི་ནང་དུ་བརྩིས་ཡོད་ལ། སྤ་བསྟན་གྱིས་གདིང་བའི་ཚབ་ཏུ་པད་ཁུག་བགྲང་ཡོད། མཁན་ཉི་མས་པད་ཁུག་རྟགས་བཞིའི་ནང་དུ་བརྩིས་མེད། བྲུ་རྒྱལ་དང་ཁྱུང་པོ་བློ་གྲོས་རྒྱལ་མཚན་གཉིས་ཀྱིས་པད་ཞུའི་ཚབ་ཏུ་པད་ཁུག་བགྲང་བ་ལས་གཞན་གསུམ་སྤྱི་དང་མཐུན། དཔལ་འབྱོར་བཟང་པོས་མཛད་པའི་རྒྱ་བོད་ཡིག་ཚང་ལས། 8ཤ༤༧༡<<བཀའ་རྟགས་ཀྱི་ཕྱག་རྒྱ་བཞི་བྱ་བ། ཞྭ་ཐེབ་མུ་ཐུམས་ས་དང་། བླ་གོས་ཀྱི་མཐའ་ཚེམས། གཏོར་བུ། ཀ་ལིའི་ནང་རྣམས་སྔོན་པོར་བྱས་པ་ཡང་། ཁོང་དྲུག་པོ་ལ་གནང་བར་བྱེད་ཅིང་། དེ་ནི་བླ་ཆེན་དང་པོ་བོན་པོའི་བརྒྱུད་པར་སོང་བའི་ཐུགས་ཞེན་བརྡའ་མཚོན་དུ་བྱས་པའོ >>ཞེས་ཞྭ་དང་ཤམ་ཐབས། གཏོར་བུ་གསུམ་ཀ་སྔོན་པོར་བྱས་པ་སྤ་བསྟན་རྒྱལ་བཟང་པོ་དང་མཐུན་ཞིང་། ཀ་ལིའི་ནང་སྔོན་པོར་བྱེད་པ་དེ་ཡང་ཁོང་གིས་དམིགས་བསལ་གྱིས་བཞེད་སྟངས་ཤིག་ལས་བོན་གཞུང་དུ་དེའི་ལུགས་བྱས་ནས་གསུངས་པ་མེད་སྙམ། གཞན་ལྟུ་རུ་དང་ལྟུར་རུ་ཞེས་པ་པད་ཞུར་གོ་བའི་འགྲེལ་ཚུལ་དང་། དེ་བཞིན་རྟོལ་བུ་ཞེས་པ་གདིང་བར་གོ་བའི་དཔེ་གཞུང་ཁུངས་དག་ཡོད་མེད་འཚོལ་བ་ནི་མོ་གཤམ་གྱི་བུ་འཚོལ་བ་དང་འདྲ་བས་ངལ་བའི་རྒྱུ་ཁོ་ན་ལས་མ་འདས་སོ།། དེ་ལས་ཐང་བའི་སྣེ་ཚང་དང་། ཐང་བའི་སྣོལ་ཚང་། ཐང་བའི་སྣལ་ཚང་ཞེས་པ་གསུམ་འབྲི་སྟངས་མི་འདྲ་ནའང་། དོན་དུ་སྟོད་འགག་གམ་དཔུང་རྡུམ་ལ་གོ་ཞེས་འགྲེལ་བཤད་ཕྱི་མ་དག་གིས་གསུངས་ཀྱང་དེའི་ལུགས་ལྟར་འགྲེལ་ན་འོས་མིན་དཔྱད་པའི་གནས་ཏེ།  ཐང་བ་ཞེས་པ་ནི་དོགས་པ་ཅན་གྱི་ཐ་སྙད་ཅིག་ཡིན་པས་རེ་ཞིག་དེ་ཙམ་བྱ། གོང་དུ་བཤད་པའི་གཏོར་བུ་དང་གཏུར་བུ་གཉིས་ཀ་གཞན་སྡེའི་བསྟན་བཅོས་ཀྱི་ཐ་སྙད་ཅིག་ཡིན་པར་བདེན་ཡང་། མཐར་དེད་ན་ཐ་སྙད་དེ་དག་གི་གོ་དོན་པད་ཁུག་ལས་གཞན་དུ་མེད། གཞན་སྡེའི་འདུལ་གཞུང་དུ་གོས་ཀྱི་ཤུབས་ལ་བཤད་པས་ཀྱང་ཤེས་སོ།།  ། ། ཁུངས་འདྲེན་ཡིག་ཆ།    1འདུལ་བའི་སྐོར། སྟོད་ཆ།  ཐེག་ཆེན་གཡུང་དྲུང་བོན་གྱི་དཔེ་ཚོགས་ཅན། 2འདུལ་བའི་སྐོར་སྟོད་ཆ། ཐེག་ཆེན་གཡུང་དྲུང་བོན་གྱི་དཔེ་ཚོགས་ཅན།3འདུལ་བའི་སྐོར། སྨད་ཆ། ཐེག་ཆེན་གཡུང་དྲུང་བོན་གྱི་དཔེ་ཚོགས་ཅན། 4འདུལ་བའི་སྐོར། སྟོད་ཆ། ཐེག་ཆེན་གཡུང་དྲུང་བོན་གྱི་དཔེ་ཚོགས་ཅན།  5གཏམ་རྒྱུད་གསེར་ཐང་། སི་ཁྲོན་མི་རིགས་དཔེ་སྐྲུན་ཁང་།  6དར་རྒྱས་གསལ་སྒྲོན། བོན་གྱི་ལོ་རྒྱུས་ཡིག་ཚང་ཆེན་མོ་ཅན། 7འདུལ་བའི་སྐོར། སྨད་ཆ། ཐེག་ཆེན་གཡུང་དྲུང་བོན་གྱི་དཔེ་ཚོགས་ཅན།8རྒྱ་བོད་ཡིག་ཚང་ཆེན་མོ། སི་ཁྲོན་མི་རིགས་དཔེ་སྐྲུན་ཁང་།       

རྫོགས་པ་ཆེན་པོའི་རྒྱུད་སྡེ་ཆེན་པོ་བཞིའི་ནང་ཚན་ནམ་མཁའ་དཀར་པོ་ཡེ་ཁྲི་མཐའ་སེལ་མ་བུ་ཆ་ལག་བཅས་ཀྱི་བྱུང་ཚུལ་སྐོར་རོབ་ཙམ་བརྗོད་པ།

། ། ་་་་་་་་་་་་་་་་་་་་་རྫོགས་པ་ཆེན་པོའི་རྒྱུད་སྡེ་ཆེན་པོ་བཞི་ལས་བཞི་པ་སྤྱི་རྒྱུད་ཆེན་པོ་ཡེ་ཁྲི་མཐའ་སེལ་གྱི་རྒྱུད་མ་བུ་ཆ་ལག་བཅས་ཀྱི་སྐོར་ཅུང་ཟད་འཆད་པ་ལ། ཐོག་མར་མ་བུ་ཆ་ལག་བཅས་ཀྱི་དོན་གང་ཡིན་ཞེ་ན། ཡེ་ཁྲི་མཐའ་སེལ་བམ་པོ་ཆེན་པོ་ལྔ་ནི་མ་དང་།  དེ་རྣམས་ཀྱི་དགོངས་འགྲེལ་བླ་ཆེན་པོ་དྲན་པ་ནམ་མཁས་མཛད་པ་མཆོང་ཆུང་ཉེར་ལྔ་དང་། ནམ་མཁའ་འཕྲུལ་མཛོད་དྲང་ངེས་གཉིས་བཅས་ནི་བུ། ཐེག་པའི་རིམ་པ་མངོན་དུ་བཤད་པའི་མདོ་རྒྱུད། ཐེག་འགྲེལ་མེ་ལོང་དགུ་བསྐོར། རྩོད་སྤོང་སྨྲ་བའི་སེང་གེ། མུ་སྟེགས་ཚར་གཅོད་གཏན་ཚིགས་ཐིགས་པའི་མདོ་རྒྱུད་བཅས་ནི་ཆ་ལག་ཅེས་གསུང་སྲོལ་འདུག འདི་རྣམས་སེམས་ཀློང་མན་ངག་གི་སྡེ་གསུམ་ལས་གང་ལ་འདུས་ཞེ་ན། དེ་གསུམ་ལས་མན་ངག་གི་སྡེར་འདུས་པའི་ཚུལ་ནི། དགོས་འདོད་གསལ་བྱེད་བཤད་གཞིའི་མཆོང་ལས། རྒྱུད་རང་གཞུང་སྡེ་གསུམ་གྱི་ཚུལ་དུ་འདུས་ཏེ། སེམས་སྡེ་ཀློང་སྡེ་མན་ངག་གི་སྡེ་དང་གསུམ་དུ་འདུས་སོ། སེམས་སྡེ་ལ་སྣ་ཚོགས་སེམས་ཡིན་དུ་སྨྲ་བའི་རྫོགས་པ་ཆེན་པོ་དང༌། གོལ་སྒྲིབ་སེམས་ཀྱི་ལ་བཟླར་སྨྲ་བའི་རྫོགས་པ་ཆེན་པོ་དང༌། བློ་རྡེག་ཐལ་འགྱུར་དུ་སྨྲ་བའི་རྫོགས་པ་ཆེན་པོའོ། །ཀློང་སྡེ་ལ་དཀར་པོ་ཆིག་ཆོད་དུ་སྨྲ་བའི་རྫོགས་པ་ཆེན་པོ་དང༌། ཀློང་ཁྲ་བོ་ཁུག་པར་སྨྲ་བའི་དང༌། ནག་པོ་ཁ་འབྱམས་སུ་སྨྲ་བའི་དང༌། སྣ་ཚོགས་ཁ་འབྱམས་སུ་སྨྲ་བའི་རྫོགས་པ་ཆེན་པོའོ། ། ། ་་་་་་་་་་་་་་་་་་་་་དེ་ཡང་མན་ངག་སྡེར་འདུས་ཏེ། དེ་ལ་ཡང་ཁ་གཏམ་དང༌། ཁ་འཐོར་དང༌། རྒྱུད་རང་གཞུང་གི་ཚུལ་དུ་བཀའ་བསྩལ་པ་དང༌གསུམ་ལས། རྒྱུད་རང་གཞུང་གི་ཚུལ་དུ་ཟབ་པས་དེར་བསྡུས། །ཞེས་གསུངས་སོ། ཁ་ཅིག་ན་རེ། ཡེ་ཁྲི་མཐའ་སེལ་དང་ནམ་མཁའ་འཕྲུལ་མཛོད་ནི། མན་ངག་སྡེ་པ་ཡིན་པར་མི་འཐད་དེ། ཀློང་སྡེ་ཡིན་པར་བཞེད་པའི་ཕྱིར་ཏེ། ནམ་མཁའ་འཕྲུལ་མཛོད་ལས། ཕྱོགས་ནི་མན་ངག་རྫོགས་ཆེན་ཀློང་གི་སྡེ་རུ་གཏོགས། ཞེས་གསུང་པའི་ཕྱིར་རོ། ཞེ་ན། ཡེ་ཁྲི་མཐའ་སེལ་ནི་མན་ངག་སྡེ་པར་འདུས་པ་དྲན་པ་ནམ་མཁའི་དགོངས་པ་ཡིན་པར་གོང་དུ་ལུང་དྲངས་ཟིན་ལ་ནམ་མཁའ་འཕྲུལ་མཛོད་ཡེ་ཁྲིའི་དགོངས་འགྲེལ་ཡིན་པས་གཞུང་མན་ངག་སྡེ་པ་དང་དེའི་དགོངས་འགྲེལ་ཀློང་སྡེ་ཡིན་པ་དེ་འདྲ་མི་སྲིད་པས་གཞུང་གང་གི་ཕྱོགས་སུ་གཏོགས་ན་འགྲེལ་བ་ཡང་དེའི་ཕྱོགས་གཏོགས་ཡིན་དགོས་པས་སོ། འོ་ན་ནམ་མཁའ་འཕྲུལ་མཛོད་དུ་མན་ངག་རྫོགས་ཆེན་ཀློང་གི་སྡེ་ཞེས་གསུང་པས་དེའི་དོན་གང་ཡིན་ཞེ་ན། མན་ངག་རྫོགས་ཆེན་ཞེས་པ་འགྲེལ་བྱ་ཡེ་ཁྲི་མཐའ་སེལ་མན་ངག་སྡེ་པ་ཡིན་པས་འགྲེལ་བ་འདི་ཡང་དེའི་ཁོངས་གཏོགས་ཡིན་པ་དང་། ཀློང་གི་སྡེ་ཞེས་པས་མན་ངག་སྡེ་པས་ཀྱང་བརྗོད་བྱ་རང་འབྱུང་ཡེ་ཤེས་ཀྱི་ཁྱད་བོན་གསལ་སྟོང་ཟུང་འཇུག་བཤད་དགོས་པས་དེའི་སྟོང་ཆ་གཙོ་བོར་བསྟན་པའི་དོན་མིན་ནམ་སྙམ། དེ་ཡང་བཀའ་ཡེ་ཁྲི་མཐའ་སེལ་མན་ངག་སྡེ་པ་ཡིན་པར་དྲན་པ་ནམ་མཁའ་རང་གིས་གསུང་ལ་དེ་ལ་བརྟེན་ནས་མཛད་པའི་བོན་རྩ་བའི་གཞུང་གང་ཡིན་དེའི་ཁོངས་སུ་གཏོགས་དགོས་པས་སོ། ཡེ་ཁྲི་མཐའ་སེལ་མན་ངག་སྡེ་པ་ཡིན་པར་དྲན་པས་གསུང་པ་ཙམ་མ་ཡིན་པར་གཞུང་གི་བསྟན་ཚུལ་ལ་དཔྱད་ན་རིགས་པས་ཀྱང་གྲུབ་སྟེ། འདིས་ཞང་ཞུང་སྙན་རྒྱུད་ལྟ་བུ་ཐོད་རྒལ་དང་ཁྲེགས་གཉིས་ཀ་ལག་ལེན་དམར་ཁྲིད་དང་བཅས་པ་ཆ་ཚང་བསྟན་པས་སོ། ། ། ་་་་་་་་་་་་་་་་་་་་་སྤྱིར་སེམས་ཀློང་མན་ངག་གི་སྡེ་སོ་སོར་ཕྱེ་ཚུལ་ནི། དེ་དག་བརྗོད་བྱ་རྫོགས་པ་ཆེན་པོའི་གཞི་ལམ་འབྲས་གསུམ་བཤད་པ་ལ་ཁྱད་པར་གང་ཡང་མེད་ནའང་དེའི་གནད་ཆ་ཚང་རང་འབྱུང་ཡེ་ཤེས་ལ་འདུས་པ་ནི། ཡེ་ཁྲི་མཐའ་སེལ་གནས་པ་གཞིའི་བམ་པོ་ལས། །མ་བཅོས་ཤེས་བྱའི་ངོ་བོ་དེ། །རང་གི་རྟོག་བསྒྲིབས་དེ་མ་མཐོང༌། །དེ་ལ་གཞི་ཞེས་ཐ་སྙད་བཏགས། །དེ་ཉིད་རྟོགས་ཐབས་ཤེས་བྱེད་ལ། །ལམ་ཞེས་བྱ་བར་ཐ་སྙད་བཏགས། །དེ་ཉིད་ཤེས་བྱ་མངོན་གྱུར་ལ། །འབྲས་བུ་ཞེས་སུ་ཐ་སྙད་བཏགས། །དེ་ཕྱིར་ངོ་བོ་གཅིག་ལས་མེད། ཅེས་དང་། ཞང་ཞུང་སྙན་རྒྱུད་རྒྱུད་བུ་ཆུང་བཅུ་གཉིས་ལས། …

བོད་མ་གསུམ་བུ་དྲུག་གི་བྱུང་བ།

རྩོམ་པ་པོ། ཁྲ་འཛུམ་དགའ། ལྷོ་རོང་། མི་རིགས་སུ་དང་གང་འདྲ་ཞིག་ཡིན་རུང་མི་རིགས་དེའི་བྱུང་ཁུངས་ལོ་རྒྱུས་དང་འཕེལ་རིམ། ཕ་མྱེས་ཡང་མྱེས་ཀྱི་རིགས་རུས་དང་ཆོ་འབྲང་གང་ཡིན་པ་སོགས་ཤེས་རྒྱུ་ནི་ཧ་ཅང་གནད་ཆེ་སྟེ། “སྲིད་པའི་འགྲོ་བ་མིའི་བྱུང་ཁུངས་མ་ཤེས་ན་ནགས་གསེབ་ཀྱི་སྤྲེའུ་འདྲ་ཞེས”གནའ་མྱི་རྒན་པོའི་བློ་གྲོས་ཀྱི་ཉིང་ཁུ་ལས་ཐོན་པའི་གཏམ་དཔེ་འདིས་ལོ་རྒྱུས་ལ་བསླབ་དགོས་པ་གསལ་པོ་བསྟན་ཡོད།  བོད་གངས་ཅན་ལྗོངས་ཀྱི་དབུ་ནག་མི་རིགས་སམ་གདོང་དམར་མི་རིགས་ཀྱི་ལོ་རྒྱུས་ནི་ཧ་ཅང་ཡུན་རིང་ལྡན་པ་དེ་འདྲ་ནི་དངོས་གནས་ལགས། ང་ཚོ་བོད་ཀྱི་མི་རྒྱུད་གྲོལ་ཚུལ་དང་རིགས་རུས་ཀྱི་བྱུང་ཁུངས་སོགས་གང་འདྲ་ཡིན་པའི་སྐོར་ལ་ཟེར་སྒྲོས་ཙམ་གྱི་མཇུག་མ་ཐུང་ཐུང་ཞིག་ལ་འཐིམ་བསྡད་པ་ལས་ད་དུང་བདེན་པའི་ནམ་ལངས་ཀྱི་སྐྱ་རེངས་ལོ་རྒྱུས་དེ་མཐོང་ཐུབ་ཀྱིན་མེད་པ་འདྲ་སྟེ། བོད་ཀྱི་མིའུ་གདུང་དྲུག་གི་བྱུང་ཁུངས་ནི་སྤྱན་རས་གཟིགས་ཀྱི་རྣམ་སྤྲུལ་སྤྲེའུ་བྱང་སེམས་ཅན་དང་རྗེ་བཙུན་སྒྲོལ་མ་འགྲོ་བ་མི་ཡི་གར་དུ་རོལ་བ་བྲག་སྲིན་མོ་གཉིས་ལས་མཆེད་ཚུལ་ནི་རང་རེའི་བོད་མི་སྤྱི་བོ་ཡོངས་ལ་རླུང་ལྟར་གྲགས། བཤད་སྟངས་དེ་ལ་རང་ངོས་ནས་དྲན་ན་ལོ་རྒྱུས་ཡུན་རིང་པོ་དེ་འདྲ་ཞིག་མ་རེད་ཀྱང་བཤད་ཚུལ་ཐོག་ནས་འགྲོ་བ་མི་ཕལ་པ་རྣམས་ཀྱི་རྣ་ལམ་དུ་རྒྱུ་སླ་ཞིང་ཚན་རིག་གིས་བཤད་ལུགས་དང་ཅུང་འདྲ་པོ་འདུག་པའི་ཚོར་སྣང་བྱུང་། དེའི་སྐོར་གླེང་གཞི་དངོས་མ་ཡིན་པས་རྒྱས་སྤྲོས་མི་བྱེད།  བོད་མ་གསུམ། སྲིད་པའི་སྒོ་ང་དཀར་ནག་ཁྲ་གསུམ་གྱི་ནང་ནས་ཁྲ་བོ་ལས་གྲོལ་བ་སྨོན་མི་མོ་བོ་འམ་ཡེ་སྨོན་རྒྱལ་པོའི་རྒྱུད་པ་ཕྱྭ་རྗེ་སྤྱི་གཙུག་རྒྱལ་ནས་ཕྱྭ་རབས་སྟ་ཆ་འལ་འོལ། ཡབ་བླ་གདལ་དྲུག སྲིད་པ་སྣེ་ཁྲོམ་ལ་ཁྲ། རྒྱལ་བུ་འཐིང་གེ བོད་འཛོམ་ལ་ཕྲ། ཨ་མྱེ་ཁྲི་ཐོག་ཆེན་པོ་སོགས་ཀྱི་རིགས་རྒྱུད་ལོ་རྒྱུས་ཡར་འདེད་དང་རྒྱུ་མ་ཕུ་འདེད་བྱས་ན་སྲིད་པ་ཕྱྭ་ལ་ཐུག་ཡོད། དེ་ནས་ཨ་མྱེ་ཁྲི་ཐོག་ཆེན་པོས་གནའ་མ་གསུམ་ལེན་པ་སྟེ། གཉན་བཟའ་དཀར་མོ། དམུ་བཟའ། སྲིན་མོ་བཟའ་གོ་ཟུ་ཅན་གསུམ་ལ་བོད་མ་གསུམ་ཟེར་བའོ། །  བོད་བུ་དྲུགཕ་རྒན་ཨ་མྱེ་ཁྲི་ཐོག་ཆེན་པོས་གནའ་མ་དང་པོ་གཉན་བཟའ་དཀར་མོ་བཞེས་པས་བོད་བུ་དྲུག་ནང་གི་ཆེ་བ། སྨུག་པོ་ལྡོང་། ཁྲི་གཟི་འགྲུ། བསེ་ཁྱུང་དབྲ། གནའ་མ་དམུ་བཟའ་ཁབ་ཏུ་བཞེས་པས་དམུ་ཚ་སྒ། གནའ་མ་སྲིན་བཟའ་གོ་ཟུ་ཅན་བཞེས་པས་དབའ་དང་ལྡ་གཉིས་སོ། ། བོད་དབུ་ནག་མིའུ་གདུང་དྲུག་ཞེས་ཀྱང་ཟེར། བུ་དྲུག་གི་ཕ་རྒན་ཨ་མྱེ་ཁྲི་ཐོག་ཆེན་པོས་རི་མགོར་མཛོ་མོ་གཉིས་འཚོ་ནས་ནངས་ནུབ་བཞོ་ཟེའུ་བརྒྱད་ཙམ་འཇོ་ནས་འཚོ་བ་སྐྱེལ་ནས་འདུག ཉིན་ཞིག་ཁོང་གིས་རི་མགོ་ལ་མཛོ་མོ་འཚོ་བསྡད་པའི་སྐབས་ཤིག་ལ་བདུད་ཀྱི་ཇག་པ་མི་བདུན་གྱིས་མཛོ་མོ་བརྐུས་ནས་དེད། ཨ་མྱེ་མཛོ་མོའི་ར་མདའ་རྒྱུགས། ལམ་བར་ནས་གཉན་གྱི་བུ་མོ་ཞིག་གིས་མཐོང་བས་ན་བདུད་ཀྱིས་ཨ་མྱེ་ལ་ལྐོག་མདའ་འཕེན་ཡོང་དྲན་ནས་བསམ་བཟང་གིས་ཨ་མྱེའི་འགྲོ་ལམ་བཀག ཨ་མྱེས་གཉན་གྱི་བུ་མོ་བསད། གཉན་གྱི་རྒྱལ་པོས་བུ་མོའི་བསད་ལན་ལ་ཨ་མྱེ་ཁྲི་ཐོག་བསད་དེ་“གདུང་དྲུག་བོད་ཀྱི་ཨ་བོ་གཉན་གྱིས་བསད།”ཅེས་གྲགས་པ་དེ་ནས་བྱུང་། བུ་སྤུན་དྲུག་གིས་བདུད་ལས་ཕ་ཨ་མྱེ་ཁྲི་ཐོག་གི་དགྲ་ཤ་ལེན་དགོས་ཟེར་བ་དང་གཉན་ལས་ཕ་སྟོང་འཇལ་དགོས་ཟེར་ཏེ་མཐར་གཉན་གྱིས་བོད་བུ་དྲུག་ལ་བུ་རེར་ཕ་སྟོང་རེ་འཇལ།  དང་པོ། སྨུག་པོ་ལྡོང་གི་སྐོར། གཉན་གྱིས་ལྡོང་ལ་ཕ་སྟོང་ལྡོང་ལྷ་རྨ་ཕྲོམ་སྤྲད།《དབུ་ནག་མིའུ་འདྲ་ཆགས》ལས་“གཡུ་འབྲུག་ཟངས་ཀྱི་ཟེ་བ་ཅན། ལྡོང་དར་ཕྱུག་ཅན་གྱི་དགྲ་བླ་བྱེད་པར་ཆད།”ཞེས་དང་། རྙིང་མའི་ལོ་རྒྱུས་ཡིག་རྙིང་།《བོད་མི་གདུང་དྲུག་གི་དར་བགོས》ལས་“གཡུ་འབྲུག་སྔོན་པོ་བཞེངས་པ་འདྲ། དེ་སྤོ་ཆུ་ལྡོང་གི་དགྲ་བླ་ཡིན”ཞེས་འཁོད་ཡོད།ལྡོང་གི་རུས་ཚན་ཆེ་ཁག་ལ་སྨུག་པོ་ལྡོང་། ང་ཆེ་ལྡོང་། ཐོག་ཐོག་ལྡོང་། དཀར་པོ་ལྡོང་། ནག་པོ་ལྡོང་། ཁྲ་བོ་ལྡོང་བཅས་དྲུག་ཡོད། སྨུག་པོ་ལྡོང་གི་རུས་ལ་ཚབ། ཁ་བོ། བེ་རི། མི་ཉག …

བོན་གྱི་གདན་ས་ཆེན་མོ་གཡས་རུ་དབེན་ས་ཁ།

། བོན་གྱི་གདན་ས་ཆེན་མོ་གཡས་རུ་དབེན་ས་ཁ། །         འདས་སོང་བའི་ལོ་རྒྱུས་ལ་ཕྱིར་མིག་ཐེངས་གཅིག་བལྟས་ཚེ། བོད་ནི་བོན་པོ་དང་བན་དྷེ། གསར་མ་དང་རྙིང་མ། འབྲོག་པ་དང་རོང་བ།གསེར་བ་དང་གཡུ་བ་སོགས་ཀྱི་རྩོད་རྙོག་ཁྲོད་ནས། རང་མི་རིགས་ཀྱི་ལོ་རྒྱུས་དང་རིག་གནས་མང་པོ་ཞིག་མེད་བརླགས་སུ་བཏང་བ་ཤེས་ཐུབ། འོན་ཀྱང་། ཉེ་ཆར་གོ་ལ་ཧྲིལ་པོར་རིག་གནས་དང་ལོ་རྒྱུས་དོགས་སློང་དང་ཞིབ་འཇུག་བྱེད་པའི་འགོ་ཚུགས་པ་དང་། བོན་གྱི་དགོན་སྡེ་དང་ཡིག་ཆ། དེར་འབྲེལ་གྱི་དམངས་སྲོལ་རིག་གནས་རྣམས་ཀྱང་མ་ཉམས་གོང་འཕེལ་དང་ཉམས་པ་སླར་གསོ་བྱེད་པའི་གོ་སྐབས་རེ་ཟུང་ཐོབ་པ་དང་བསྟུན། ཕྲན་གྱིས་ཀྱང་བོད་ཀྱི་ལོ་རྒྱུས་རིག་གནས་ལ་ཁ་སྐོང་ཙམ་ཞིག་ཡོང་བའི་ཆེད་དུ། དུས་རབས་བཅུ་གཅིག་པ་ནས་བཅུ་བཞིའི་བར་དུ་བྱུང་བའི་བོན་གྱི་གདན་ས་གཡས་རུ་དབེན་ས་ཁ་ཞེས་པ་དེ་ངོ་སྤྲོད་མདོར་ཙམ་ཞུས་པ་འདིར་ལགས།